کوالالمپور (جانب منزل نیوز) ملائیشیا کے وزیراعظم صابری یعقوب نے پارلیمنٹ تحلیل کردی ہے جس کے بعد ملک میں نئے انتخابات کی راہ ہموار ہوگئی ہے۔
ملائیشین میڈیا کے مطابق ملائیشین وزیراعظم صابری یعقوب نے پارلیمنٹ تحلیل کرنے کا اعلان کیا جس سے ملک میں جلد الیکشن کی راہ ہموار ہوگئی ہے کیونکہ پارلیمنٹ کی تحلیل کے بعد 60 روز میں الیکشن کا انعقاد ضروری ہے۔
ٹی وی پر قوم سے خطاب میں ملائیشین وزیراعظم نے کہا کہ ان کی گزشتہ روز بادشاہ سے ملاقات ہوئی جس میں انہوں نے پارلیمنٹ کی تحلیل کی اجازت طلب کی جس پر بادشاہ نے پارلیمنٹ تحلیل کرنے کی درخواست کو قبول کرلیا۔
میڈیا رپورٹس کے مطابق ملائیشین وزیراعظم کی جانب سے یہ اعلان ان کی اپنی جماعت کی طرف سے جلد الیکشن کے مطالبے کے بعد سامنے آیا ہے۔
میڈیا رپورٹس میں بتایا گیا ہے کہ صابری یعقوب کو اپنی جماعت کی طرف سے شدید دباؤ کا سامنا تھا جس کے باعث وہ سب سے کم عرصے وزارتِ عظمیٰ پر براجمان رہے۔