اسلام آباد (جانب منزل نیوز) چیئرمین پاکستان تحریک انصاف اور سابق وزیر اعظم عمران خان کی ایک اور آڈیو لیگ ہوگئی ہے جس میں وہ ایم این ایز کو خریدنے کی بات کررہے ہیں۔
سابق وزیر اعظم مبینہ طور پر اپنی کابینہ سے کہہ رہے ہیں کہ آپ کو یہ غلط فہمی ہوگئی ہے کہ اب نمبر گیم پوری ہو گئی ہے، یہ نمبر ایسا ہے نہیں، ایسا مت سوچیں کہ سب ختم ہو گیا۔
مبینہ آڈیو میں عمران خان کہہ رہے ہیں کہ اب سے لے کر 48 گھنٹے بہت اہم ہیں،اس میں بڑی چیزیں ہو رہی ہیں، میں اپنی طرف سے کئی چالیں چل رہا ہوں ہم اسے پبلک نہیں کر سکتے۔
عمران خان آڈیو میں کہتے سنائی دیتے ہیں کہ پانچ ایم این ایز تو میں خرید رہا ہوں، میرے پاس جو 5 ہیں، وہ بڑے اہم ہیں۔
عمران خان آڈیو میں کسی کا اشارہ کرتے ہوئے ہدایت دے رہے ہیں کہ اس کو کہیں کہ اگر وہ ہمیں 5 ارکان مزید لے دے تو 10 ہوجائیں گے اور یہ گیم ہمارے ہاتھ میں ہے۔
عمران خان کہہ رہے ہیں کہ اس وقت قوم الارم ہوئی ہے اور وہ چاہتے ہیں کہ ہم کسی طرح بھی جیت جائیں، اس لئے کوئی فکر نہ کریں کہ یہ ٹھیک ہے یا غلط ہے، کوئی بھی حربہ ہو، اگر کوئی ایک ایک بھی ایم این اے توڑ دیتا ہے تو اس سے بھی بہت فرق پڑے گا۔