دبئی اور سنگاپور جانے والے بھارتی سیاحوں کے لیے بڑی سہولت متعارف

دبئی (جانِب منزل نیوز) متحدہ عرب امارات اور سنگاپور جانے والے بھارتی سیاحوں کے لیے سفری سہولتوں میں اضافہ ہوگیا، اب بھارتی شہری اپنے مقامی ڈیجیٹل ادائیگی کے نظام یو پی آئی کے ذریعے معروف سیاحتی مقامات کے ٹکٹ آن لائن بک کروا سکیں گے۔
بھارتی وزارتِ خزانہ کے مطابق دبئی کے برج خلیفہ کے ’’ایٹ دی ٹاپ‘‘ اور سنگاپور کے ریزورٹس ورلڈ سینٹوسا میں یو پی آئی کے ذریعے آن لائن ادائیگی کی سہولت متعارف کرادی گئی ہے۔
اس اقدام کے تحت بھارتی سیاح اپنے موبائل فون پر دستیاب یو پی آئی ایپس کے ذریعے آسانی سے ٹکٹوں کی ادائیگی کرسکیں گے، جس سے بیرون ملک سفر کے دوران ادائیگیوں کا عمل مزید سہل اور تیز ہوگا۔
یہ سہولت این پی سی آئی انٹرنیشنل پیمنٹس لمیٹڈ ، یو اے ای کے ادائیگی فراہم کرنے والے ادارے نیوپے اور ایمار انٹرٹینمنٹ کے اشتراک سے متعارف کرائی گئی ہے۔
سنگاپور میں بھی بھارتی سیاح یو پی آئی کے ذریعے یونیورسل اسٹوڈیوز سنگاپور، سنگاپور اوشیناریم اور ایڈونچر کوو واٹر پارک سمیت مختلف تفریحی مقامات کے ٹکٹ بک کرسکیں گے۔
وزارتِ خزانہ کے مطابق 2025 میں سنگاپور آنے والے بھارتی سیاحوں کی تعداد 12 لاکھ رہی۔ ڈیجیٹل ادائیگیوں کی یہ سہولت سیاحت کے فروغ اور بین الاقوامی اقتصادی روابط مضبوط بنانے میں معاون ثابت ہوگی۔
بھارتی ڈیجیٹل ادائیگی کا نظام یو پی آئی اب متحدہ عرب امارات، سنگاپور، فرانس، ماریشس، نیپال، بھوٹان، قطر، سری لنکا، کمبوڈیا اور یونان سمیت 10 ممالک میں دستیاب ہے۔
بھارتی وزارتِ خزانہ کے مطابق اس نظام کو مزید ممالک تک وسعت دینے کے لیے اقدامات جاری ہیں، جس سے بھارتی شہریوں کے لیے بیرون ملک سفر، خریداری اور سیاحتی مقامات کی بکنگ مزید آسان بنائی جا رہی ہے۔