دبئی میں سیاحت کے فروغ کے لیے شیخ حمدان کے 3 بڑے اقدامات

دبئی (جانب منزل نیوز) دبئی کے ولی عہد شیخ حمدان بن محمد بن راشد المکتوم نے امارات کی عالمی سیاحتی حیثیت مزید مستحکم بنانے اور دبئی کو دنیا کے 3 سرفہرست سیاحتی مقامات میں شامل کرنے کے لیے 3 اہم اقدامات کا آغاز کر دیا ہے۔
نئے اقدامات کے تحت شہر بھر میں سیاحوں کے لیے خصوصی لائلٹی پروگرام متعارف کرایا جائے گا، ویزا درخواستوں کا طریقہ کار آسان بنایا جائے گا اور سیاحوں کو مختلف معلومات اور سرکاری خدمات ایک ہی ڈیجیٹل پلیٹ فارم پر فراہم کی جائیں گی۔
دبئی میں متعارف کرائے جانے والے نئے سیاحتی لائلٹی پروگرام کے تحت بار بار امارات آنے والے سیاحوں کو مختلف تفریحی مقامات، کاروباری اداروں اور دیگر سہولتوں پر خصوصی رعایتیں اور مراعات فراہم کی جائیں گی۔
اس اقدام کا مقصد سیاحوں کی دوبارہ آمد بڑھانے اور دبئی کو بین الاقوامی سیاحوں کی پسندیدہ منزل بنانا ہے۔
نئے منصوبے کے تحت سیاح وزٹ دبئی (Visit Dubai) پلیٹ فارم کے ذریعے براہ راست ویزا درخواستیں جمع کرا سکیں گے۔ اس میں سنگل انٹری اور ملٹی پل انٹری ویزا کی سہولت بھی شامل ہوگی، جبکہ منظوری متعلقہ شرائط کے مطابق دی جائے گی۔
تیسرے اقدام کے تحت ایک مربوط ڈیجیٹل پلیٹ فارم تیار کیا جائے گا، جہاں سیاحوں کو سفر سے متعلق معلومات اور ضروری سرکاری خدمات تک آسان رسائی حاصل ہوگی۔
وزٹ دبئی کی سرکاری ویب سائٹ پر سیاحتی ویزا درخواستوں سمیت مختلف سرکاری خدمات کو یکجا کیا جائے گا، جس سے سیاحوں کے لیے سفری منصوبہ بندی اور سہولتوں کا حصول مزید آسان ہوگا۔
حکام کے مطابق یہ اقدامات دبئی کے سیاحتی شعبے کو جدید خطوط پر استوار کرنے، عالمی سطح پر مسابقت بڑھانے اور امارات کو دنیا کے نمایاں ترین سیاحتی مراکز میں شامل کرنے کی حکمت عملی کا حصہ ہیں۔