متحدہ عرب امارات متحدہ عرب امارات

امارات میں مصنوعی ذہانت سے چلنے والا نیا ایچ آر اسسٹنٹ متعارف، سرکاری خدمات میں انقلابی قدم

پیر 15 ستمبر 2025ء

---

ابوظہبی:(نمائندہ خصوصی)  وفاقی اتھارٹی برائے حکومتی انسانی وسائل (FAHR) نے مصنوعی ذہانت پر مبنی ایک نیا ہیومن ریسورس اسسٹنٹ متعارف کرایا ہے، جو سرکاری اداروں میں جدید ٹیکنالوجی کے انضمام کی جانب ایک اہم پیش رفت ہے۔

یہ اقدام نہ صرف ایچ آر خدمات کو نئی جہت فراہم کرے گا بلکہ ملازمین کے تجربے کو بہتر بنانے، ادارہ جاتی کارکردگی بڑھانے اور فوری و درست خدمات کی فراہمی کو یقینی بنانے میں بھی سنگِ میل ثابت ہوگا۔

پہلے مرحلے میں یہ اسسٹنٹ 50 ہزار سے زائد وفاقی ملازمین کو خدمات فراہم کرے گا، جس کے تحت 108 سروسز دستیاب ہوں گی اور 80 فیصد خودکار ایچ آر طریقہ کار اس پلیٹ فارم کے ذریعے مکمل کیے جائیں گے۔ رپورٹ کے مطابق، یہ نظام ایچ آر سے متعلقہ 80 فیصد سوالات کے خودکار جوابات فراہم کرے گا جس سے سالانہ تقریباً 1 لاکھ 70 ہزار اوقاتِ کار تکنیکی و قانونی معاونت میں بچائے جا سکیں گے۔

یہ اسسٹنٹ جدید اے آئی ایجنٹ پلیٹ فارم پر تیار کیا گیا ہے جو اتھارٹی کے ایچ آر مینجمنٹ سسٹم \"بیاناتی\" سے ڈیٹا کا تجزیہ کر کے درست اور ذاتی نوعیت کے جوابات فراہم کرتا ہے۔ صارفین اس سہولت سے دن رات، ویب سائٹ یا موبائل ایپ کے ذریعے، تحریری یا صوتی شکل میں، عربی اور انگریزی دونوں زبانوں میں فائدہ اٹھا سکتے ہیں۔