متحدہ عرب امارات متحدہ عرب امارات

شارجہ سمر پروموشنز 2025 کا شاندار آغاز — لاکھوں درہم کے انعامات اور ناقابلِ فراموش رعایتیں

جمعہ 04 جولائی 2025ء

---

شارجہ (نمائندہ خصوصی)

شارجہ میں ہر سال کا انتظار کی جانے والی \"شارجہ سمر پروموشنز 2025\" کا باقاعدہ آغاز ہو گیا ہے، جو اس بار بھی شہریوں، سیاحوں اور خریداروں کے لیے شاپنگ، تفریح اور اہلِ خانہ کے ساتھ خوشگوار لمحات گزارنے کا منفرد موقع فراہم کر رہی ہے۔

\"ایک ناقابلِ فراموش موسمِ گرما کے لیے شاندار آفرز\" کے تھیم کے تحت چلنے والی یہ مہم یکم ستمبر 2025 تک جاری رہے گی۔ اس مہم کے دوران نہ صرف بڑے پیمانے پر ڈسکاؤنٹس کی پیشکش کی جا رہی ہے بلکہ 30 لاکھ درہم کے انعامات بھی شرکاء کا انتظار کر رہے ہیں۔

شارجہ چیمبر آف کامرس اینڈ انڈسٹری کے زیرِ اہتمام ہونے والی اس سالانہ مہم کا مقصد شارجہ کو ایک خاندانی، پُرامن اور سیاحتی مرکز کے طور پر اجاگر کرنا ہے، جہاں مقامی باشندوں اور بین الاقوامی سیاحوں کو ایک ہی جگہ پر خریداری، تفریح اور انعامات کا حسین امتزاج ملتا ہے۔

امارت کے مختلف مالز، مارکیٹس اور تجارتی مراکز میں صارفین کو پرکشش رعایتیں، تحائف اور قرعہ اندازی کے ذریعے بڑے انعامات جیتنے کا موقع فراہم کیا جا رہا ہے، جس سے کاروباری سرگرمیوں کو فروغ اور مقامی معیشت کو تقویت ملے گی۔ شارجہ سمر پروموشنز 2025 نہ صرف خریداری کا تہوار ہے بلکہ یہ امارت کی معاشی، سماجی اور سیاحتی ترقی کا عکاس بھی ہے۔