شارجہ کا دل جیتنے والا اقدام، 500 محنت کش عمرے کی سعادت حاصل کریں گے

شارجہ (جانب منزل نیوز) نیکی، خدمت اور انسانیت کی ایک خوبصورت مثال قائم کرتے ہوئے شارجہ چیریٹی انٹرنیشنل نے 500 محنت کشوں کے لیے 10 روزہ عمرہ سفر کا اہتمام کیا ہے، تاکہ مالی وسائل کی کمی کے باعث مقدس سفر سے محروم افراد بھی اللہ کے گھر حاضری کی سعادت حاصل کر سکیں۔
ادارے کا یہ اقدام ’’عمرہ سہولت‘‘ منصوبے کا حصہ ہے، جس کے تحت محنت کشوں، کینسر کے مریضوں، نمایاں طلبہ اور مستحق خاندانوں سمیت معاشرے کے مختلف طبقات کی معاونت کی جا رہی ہے۔
ادارے کے ایگزیکٹو ڈائریکٹر عبداللہ سلطان بن خادم کے مطابق، گزشتہ 10 برسوں کے دوران اس مہم کے ذریعے 5 ہزار 61 افراد عمرے کی سعادت حاصل کر چکے ہیں۔
10 روزہ سفر کے دوران شرکاء کو عمرے کی ادائیگی کے ساتھ مدینہ منورہ میں مسجد نبوی ﷺ کی زیارت کا بھی موقع ملے گا۔ مسافروں کے ہمراہ خصوصی نگران ٹیم موجود ہوگی، جو مناسکِ عمرہ کی ادائیگی میں رہنمائی اور معاونت فراہم کرے گی۔
شارجہ چیریٹی انٹرنیشنل نے مخیر حضرات اور عطیہ دہندگان کا شکریہ ادا کرتے ہوئے کہا کہ ان کا تعاون فلاحی سرگرمیوں کو جاری رکھنے اور مستحق افراد کی زندگیوں میں خوشیاں لانے کا اہم ذریعہ ہے۔