دبئی(جانب منزل نیوز)قونصلیٹ جنرل پاکستان دبئی کے ڈپٹی قونصل جنرل گیان چند نے کہا ہے کہ دنیا کا کوئی مذہب اختلاف یا بیر رکھنا نہیں سکھاتا بلکہ آپس میں پیار، محبت اور اخوت کا درس دیتا ہے۔ خدا تعا لیٰ بھی اپنی مخلوق کو ایک دوسرے کا احساس کرنے اور ایک دوسرے کا دکھ درد بانٹنے کا حکم دیتا ہے لہذا ہم سب کو چاہیے کہ ہم سب مل جل کر پیار، محبت، امن اور صلح جوئی سے رہیں۔انہوں نے مسیحی کمیونٹی کی طرف سے منعقد کئے گئے کرسمس ایونٹ میں شرکت کی۔
قونصلیٹ جنرل پاکستان دبئی اور حکومت پاکستان کی طرف سے مسیحی برادری کو کرسمس کے موقع پر مبارکباد دی۔ نیو اپاسٹا لک چرچ انٹرنیشنل دبئی کے بینر تلے کرسمس ایونٹ کا اہتمام معروف مسیحی رہنما، پریذیڈنٹ پاکستان مسلم لیگ ن منارٹی ونگ جان قادر اور ان کے ساتھیوں نے کیا جس میں پاکستان مسلم لیگ ن کے مرکزی نائب صدر محمد شہزاد بٹ، مسلم لیگ ن دبئی کے صدر عامرسہیل گھمن، بیلجیم سے ایم اقبال، جیکب حاکم دین، پادری صابر مسیح اور مسیحی برادری کے متعدد لوگوں نے شرکت کی۔
پروگرام کا آغاز مسیحی کلام اور مذہبی گیتوں سے کیا گیا۔ کرسمس کی تقریب کے لیے ہوٹل کا وسیع ہال خوبصورت جھنڈیوں اور پھولوں سے سجایا گیا تھا۔ تقریب میں زیادہ تر مسیحی فیملیز نے شرکت کی۔ ڈپٹی قونصل جنرل گیان چند کی موجودگی میں سب نے مل کر کرسمس کیک کاٹا اور خوشیوں کا اظہار کیا۔ محمد شہزاد بٹ اور عامر سہیل گھمن نے کہا کہ ہم ہمیشہ مسیحی برادری کے ساتھ کھڑے ہیں۔ ہم سمجھتے ہیں کہ پاکستان کی بنیاد کے لیے مسیحی بھائیوں نے بھی قربانیاں دیں۔ انہوں نے پاکستان کے حصول میں اہم کردار ادا کیا۔
اس موقع پر انہوں نے قائد اعظم محمد علی جناح کی جدوجہد کو بھی سراہا اور انہیں خراج تحسین پیش کیا۔ پریذیڈنٹ پاکستان مسلم لیگ ن منارٹی ونگ جان قادرنے خطاب کرتے کہا کہ مسیحی مذہب ایک دوسرے سے ہمدردی اور پیار سے رہنے کا درس دیتا ہے۔ خاص طور پر اپنے ہمسایوں سے حسن سلوک پر زور دیا ۔ ہمیں دنیا میں امن پھیلانے کے لیے اپنے مذہبی سربراہ کے نقش قدم پر چلنے کی ضرورت ہے۔
جان قادر نے مزید کہا کہ پاکستان ہمارا ملک ہے اور ہم پاکستان کے دفاع کے لیے کھڑے ہیں۔ ہم ہمیشہ اپنے مسلمان بھائیوں کے ساتھ ہیں۔ قائداعظم محمد علی جناح کا پاکستان ہماری پہچان ہے۔ پروگرام کے اختتام پر مسیحی مذہبی رہنماؤں نے پاکستان اور متحدہ عرب امارات کی سلامتی اور خوشحالی کے لیے دعا کی۔