لاہور (جانب منزل نیوز) روزمرہ زندگی میں چند لمحوں میں کھا لیا جانے والا ایک چمچ شہد دراصل شہد کی مکھیوں کی انتھک محنت، قدرتی مہارت اور حیرت انگیز اجتماعی نظام کا نتیجہ ہوتا ہے۔
سائنسی معلومات کے مطابق ایک کارکن شہد کی مکھی اپنی پوری زندگی میں اوسطاً صرف ایک چائے کے چمچ کا بارہواں حصہ شہد تیار کر پاتی ہے، یعنی ایک چمچ شہد کے پیچھے تقریباً 12 مکھیوں کی زندگی بھر کی محنت شامل ہوتی ہے۔
دلچسپ بات یہ ہے کہ صرف ایک پاؤنڈ (تقریباً 454 گرام) شہد جمع کرنے کے لیے شہد کی مکھیوں کو 20 لاکھ سے زائد پھولوں کا دورہ کرنا پڑتا ہے، جبکہ اس دوران وہ مجموعی طور پر تقریباً 55 ہزار میل کا فاصلہ طے کرتی ہیں۔
شہد تیار کرنے کا عمل بھی قدرت کا ایک منفرد شاہکار ہے۔ مکھیاں پھولوں سے رس جمع کرکے اپنے مخصوص معدے میں موجود قدرتی انزائمز کے ساتھ ملاتی ہیں۔ بعدازاں اس رس کو چھتے کے خانوں میں محفوظ کیا جاتا ہے، جہاں مکھیاں اپنے پروں سے مسلسل ہوا دے کر اضافی نمی ختم کرتی ہیں اور یوں گاڑھا، خوش ذائقہ شہد تیار ہوتا ہے۔





