کراچی (جانب منزل نیوز) معروف پاکستانی گلوکار عاصم اظہر کی شادی اور منگنی سے متعلق قیاس آرائیوں نے سوشل میڈیا پر ہلچل مچا دی۔ تقریب کی وائرل تصاویر میں عاصم اظہر کو شیروانی جبکہ دلہن کو سبز لباس میں دیکھ کر مداحوں نے منگنی یا نکاح کی خبریں پھیلانا شروع کردیں۔
تصاویر میں اداکار یاسر حسین بھی عاصم اظہر کے ساتھ ڈانس کرتے دکھائی دیے، جس کے بعد سوشل میڈیا پر چہ مگوئیاں مزید تیز ہوگئیں۔
تاہم گلوکار نے بالآخر خاموشی توڑتے ہوئے انسٹاگرام اسٹوری کے ذریعے مداحوں کو یقین دلایا کہ وہ اپنی شادی سے متعلق خبر خود سب کو دیں گے۔ عاصم اظہر نے دلچسپ انداز میں کہا: ’’سب کو خود بتا دوں گا، شادی کی ٹینشن نہ لیں۔‘‘میڈیا رپورٹس کے مطابق وائرل ہونے والی تصاویر دراصل ایک موبائل فون کے اشتہار کی شوٹنگ سے متعلق تھیں، جس کے پرومو میں شادی کی تقریب کا منظر دکھایا گیا تھا۔ یوں ایک اشتہاری شوٹ نے سوشل میڈیا پر شادی کی خبروں کو جنم دے دیا





