فٹبال کے بے تاج بادشاہ رونالڈو کی نئی اننگز، ٹی وی انٹرٹینمنٹ کی دنیا میں انٹری

دبئی (جانب منزل نیوز) فٹبال کے عالمی سپر اسٹار کرسٹیانو رونالڈو نے کھیل کے میدان سے آگے بڑھتے ہوئے شوبز کی دنیا میں قدم رکھ دیا۔ پرتگال کی قومی ٹیم سے بین الاقوامی ریٹائرمنٹ کے اعلان کے چند روز بعد ہی رونالڈو نے اپنی پہلی ٹیلی ویژن سیریز **’Day 1s‘** کی پروڈکشن شروع ہونے کا اعلان کرکے مداحوں کو حیران کر دیا۔
41 سالہ پرتگالی اسٹار نے انسٹاگرام پر خوشخبری شیئر کرتے ہوئے کہا کہ ان کے پہلے ٹی وی شو کی تیاریوں کا باقاعدہ آغاز ہو چکا ہے اور مزید تفصیلات جلد سامنے آئیں گی۔
برطانوی فٹبال کی دنیا کے گرد گھومنے والی یہ ڈرامہ سیریز کھیل کے پس پردہ کاروباری معاملات، طاقت کی کشمکش، بڑے معاہدوں، مذاکرات اور فٹبال ایجنسیوں کے اندرونی تعلقات کو دلچسپ انداز میں پیش کرے گی۔
سیریز میں معروف اداکار ڈیمین لیوس اسٹینلے ڈالٹن نامی بااثر فٹبال ایجنٹ کا کردار ادا کریں گے، جبکہ سابق فرانسیسی فٹبال اسٹار تھیری ہنری اور برطانوی ریپر ڈیو کی شمولیت بھی متوقع ہے۔
رونالڈو برطانوی فلم ساز میتھیو وان کے ساتھ قائم کردہ پروڈکشن کمپنی **UR•Marv Studios** کے ذریعے اس منصوبے کا حصہ ہیں۔ وہ سیریز کے ایگزیکٹو پروڈیوسر ہوں گے اور اسکرپٹڈ اداکاری کی دنیا میں بھی اپنا ڈیبیو کرنے جا رہے ہیں۔
پانچ مرتبہ بیلن ڈی اور ایوارڈ جیتنے والے رونالڈو کے لیے یہ نیا منصوبہ ان کے کاروباری سفر میں ایک اہم اضافہ ہے۔ فٹبال، فیشن، ہوٹل انڈسٹری اور میڈیا کے بعد اب ان کی نظریں ٹیلی ویژن اور فلمی دنیا پر مرکوز ہیں۔