اونز جابر اور اسپیشل اولمپکس یو اے ای کا خصوصی کھلاڑیوں کے لیے بڑا اقدام

دبئی (جانب منزل نیوز) کھیلوں کی دنیا میں شمولیت، مساوی مواقع اور خصوصی صلاحیتوں کے اعتراف کی جانب متحدہ عرب امارات نے ایک قابلِ تحسین قدم اٹھا لیا۔ عالمی شہرت یافتہ تیونس کی ٹینس اسٹار اونز جابر (Ons Jabeur) کی ٹینس اکیڈمی اور اسپیشل اولمپکس یو اے ای کے درمیان خصوصی افراد کو ٹینس کے کھیل سے جوڑنے اور ان کی صلاحیتوں کو نکھارنے کے لیے اہم معاہدہ طے پاگیا۔
اس شراکت داری کے تحت خصوصی افراد کو ٹینس کی جدید تربیت، پیشہ ورانہ کوچنگ اور کھیل کے میدان میں آگے بڑھنے کے نئے مواقع فراہم کیے جائیں گے۔ معاہدے کا بنیادی مقصد ابھرتے ہوئے ٹیلنٹ کو تلاش کرنا، خصوصی کھلاڑیوں کی حوصلہ افزائی کرنا اور کھیلوں کو ہر فرد کے لیے قابلِ رسائی بنانا ہے۔
منصوبے کے تحت کوچز اور تربیتی عملے کو خصوصی افراد کی ضروریات کے مطابق تربیت دینے کے ساتھ یونیفائیڈ اسپورٹس کو بھی فروغ دیا جائے گا، جس میں خصوصی افراد اور دیگر کھلاڑی ایک ہی ٹیم کا حصہ بن کر کھیل سکیں گے۔ اس اقدام سے کھیل کے ذریعے اعتماد، خودمختاری اور معاشرتی ہم آہنگی کو نئی تقویت ملے گی۔
اسپیشل اولمپکس یو اے ای کے نیشنل ڈائریکٹر طلال الہاشمی نے شراکت داری کو خصوصی کھلاڑیوں کے لیے نئے امکانات کا دروازہ قرار دیا، جبکہ اونز جابر اکیڈمی کے نمائندے کریم کامون کا کہنا تھا کہ ٹینس ہر ایک کے لیے ہے اور ہر کھلاڑی اپنی صلاحیتیں دکھانے کا یکساں حق رکھتا ہے۔
قابلِ ذکر بات یہ ہے کہ یو اے ای کے کھلاڑیوں نے اسپیشل اولمپکس ورلڈ گیمز برلن 2023 میں ٹینس کے مقابلوں میں تین تمغے حاصل کیے تھے، جبکہ یو اے ای کی کھلاڑی کلاری لیہمکول نے 2026 میں بلغاریہ میں منعقدہ ڈاؤن سنڈروم ورلڈ چیمپئن شپ میں خواتین کا سنگلز ٹائٹل جیت کر ایک اور نمایاں کامیابی اپنے نام کی۔
معاہدے کے ساتھ خصوصی تربیتی ورکشاپ کا انعقاد بھی کیا گیا، جس میں کوچز کو خصوصی کھلاڑیوں کے ساتھ مؤثر رابطے، انفرادی ضروریات اور بہتر تربیتی طریقوں سے آگاہ کیا گیا۔