ایک دور کی اختتامی گھنٹی، نئے عہد کی دستک، سائبر ٹرک کے بعد ٹیسلا کی نظریں خودکار روبوٹیکسی کے مستقبل پر مرکوز

واشنگٹن (جانب منزل نیوز) دنیا کی ٹیکنالوجی اور الیکٹرک گاڑیوں کی صنعت میں ایک بڑی تبدیلی کا اشارہ مل گیا، ٹیسلا کے سربراہ ایلون مسک نے اپنی مستقبل پسند گاڑی سائبر ٹرک کی پیداوار ختم کرنے کا عندیہ دے دیا۔ کمپنی 2027 کے وسط تک ٹیکساس میں واقع اپنی گیگا فیکٹری میں اس منفرد الیکٹرک پک اَپ کی تیاری مرحلہ وار بند کرنے کی تیاری کر رہی ہے۔
ایلون مسک نے سوشل میڈیا پلیٹ فارم ایکس پر بتایا کہ سائبر ٹرک کی پیداوار کم کرکے فیکٹری میں جدید خودکار روبوٹیکسی سائبرکَیب کی تیاری کے لیے مزید گنجائش پیدا کی جائے گی۔ تاہم سائبر ٹرک کو مکمل طور پر ختم کرنے یا کسی دوسرے مقام پر اس کی پیداوار جاری رکھنے کے حوالے سے حتمی فیصلہ سامنے نہیں آیا۔
نومبر 2019 میں متعارف ہونے والی سائبر ٹرک اپنے غیر معمولی زاویہ دار ڈیزائن، چمکتی اسٹین لیس اسٹیل باڈی اور مستقبل سے مشابہ منفرد ساخت کے باعث دنیا بھر میں توجہ کا مرکز بنی تھی۔ ابتدائی دنوں میں اس کے لیے ڈھائی لاکھ پری آرڈرز موصول ہونے کا دعویٰ کیا گیا تھا، تاہم پیداواری تاخیر، فروخت کی توقعات پوری نہ ہونے، مختلف ری کالز اور معیار سے متعلق شکایات نے اس کی تجارتی کامیابی کو متاثر کیا۔
ٹیسلا کے سائبر ٹرک کے مرکزی انجینئر ویس موریل نے اسے جدید ٹیکنالوجی کی ترقی کا اہم تجرباتی پلیٹ فارم قرار دیتے ہوئے کہا کہ اس کی ٹیکنالوجی سائبرکَیب کے ذریعے آگے بڑھتی رہے گی۔ ایلون مسک نے مداحوں کو یقین دہانی کرائی ہے کہ سڑکوں پر موجود سائبر ٹرک طویل عرصے تک اپنی موجودگی برقرار رکھیں گے۔
دوسری جانب ٹیسلا کی دو نشستوں پر مشتمل سائبرکَیب کو مستقبل کی خودکار ٹرانسپورٹ کا اہم منصوبہ قرار دیا جا رہا ہے۔ اس گاڑی میں اسٹیئرنگ وہیل اور روایتی پیڈلز بھی موجود نہیں، جبکہ کمپنی مصنوعی ذہانت اور ڈرائیور کے بغیر سفر کی ٹیکنالوجی کو اپنی آئندہ حکمت عملی کا مرکز بنا رہی ہے۔