رفتار کا سلطان ابو ظہبی میں، الیکٹرک سپر کار نے 503 کلومیٹر فی گھنٹہ کی برق رفتار سے دنیا کو حیران کردیا

ابو ظہبی (جانب منزل نیوز) رفتار، طاقت اور جدید ٹیکنالوجی کا حیران کن امتزاج! متحدہ عرب امارات کے دارالحکومت ابو ظہبی نے عالمی آٹو موبائل انڈسٹری میں ایک نیا سنگِ میل عبور کرلیا، جہاں چینی کمپنی BYD کی الیکٹرک ہائپر کار یانگ وانگ U9 ایکسٹریم نے 503.17 کلومیٹر فی گھنٹہ کی برق رفتار حاصل کرکے دنیا کی تیز ترین پروڈکشن کار کا اعزاز اپنے نام کرلیا۔
یکم نومبر 2026 کو شیخ خلیفہ بن زاید النہیان روڈ (E11) پر منعقدہ خصوصی آزمائشی رن میں پروفیشنل ریسنگ ڈرائیور مارک باسینگ نے گاڑی کو ایسی رفتار سے دوڑایا کہ آٹو موبائل کی دنیا میں نئی تاریخ رقم ہوگئی۔ یہ پہلی پروڈکشن کار ہے جس نے 500 کلومیٹر فی گھنٹہ کی نفسیاتی حد کو بھی پیچھے چھوڑ دیا۔
اس سنسنی خیز عالمی ریکارڈ کے پیچھے ابو ظہبی کا جدید ترین انفراسٹرکچر، شاندار ٹرانسپورٹ نیٹ ورک اور سرکاری اداروں کی بہترین منصوبہ بندی بھی شامل رہی۔ ابو ظہبی انویسٹمنٹ آفس، محکمہ ثقافت و سیاحت اور ابو ظہبی موبیلٹی سمیت متعلقہ اداروں نے اس تاریخی سرگرمی کو ممکن بنانے میں اہم کردار ادا کیا۔
حکام کے مطابق اس کامیابی نے عالمی آٹو موبائل کمپنیوں کے لیے ابو ظہبی کی کشش مزید بڑھا دی ہے۔ جدید ٹیکنالوجی، عالمی رابطوں اور سرمایہ کاری کے سازگار ماحول کے باعث امارات مستقبل کی آٹو موبائل انڈسٹری میں اپنی پوزیشن مضبوط بنا رہا ہے۔