دبئی میں فلپائنی تارکین وطن کے لیے خوشخبری، 20 ہزار ورکرز حکومتی سہولیات سے مستفید

دبئی (جانب منزل نیوز) بیرون ملک مقیم فلپائنی شہریوں کی آسانی اور فلاح و بہبود کے لیے دبئی میں شاندار حکومتی اقدام، فلپائن حکومت کے خصوصی سروس کاروان کے ذریعے تقریباً 20 ہزار اوورسیز ورکرز تک سہولیات پہنچا دی گئیں۔
دبئی کے ملینیم پلازا ڈاؤن ٹاؤن ہوٹل میں منعقدہ چوتھے ’’باغونگ بایانی نگ مونڈو: او ایف ڈبلیو سروسو کاروان‘‘ میں 12 سرکاری اداروں نے حصہ لیا، جہاں ایک ہی مقام پر 50 سے زائد سرکاری خدمات فراہم کی گئیں۔ ان سہولیات میں قانونی رہنمائی، طبی معاونت، مالی امداد، سرکاری دستاویزات، سول رجسٹریشن اور پیشہ ورانہ اسناد کا حصول شامل ہے۔
فلپائن کے محکمہ برائے تارکین وطن کے سیکریٹری ہانس لیو کاکڈیک کے مطابق دنیا بھر میں 26 سروس کاروانز کے ذریعے تقریباً 70 ہزار فلپائنی ورکرز کو سہولیات فراہم کی جا چکی ہیں۔ دبئی میں اس کامیاب سلسلے کا پانچواں مرحلہ 2027 کی پہلی سہ ماہی میں منعقد کرنے کی منصوبہ بندی بھی کی جا رہی ہے۔
اس اقدام کے تحت ڈیجیٹل ایمپلائمنٹ اسسٹنس پلیٹ فارم کے حوالے سے ڈیٹا فلو گروپ کے ساتھ معاہدہ بھی کیا گیا، جس سے متحدہ عرب امارات میں فلپائنی ورکرز کی بھرتی کے لیے آجروں کی منظوری کا عمل مزید تیز اور آسان ہوگا۔
کاروان میں سرکاری معاملات میں تاخیر کے ازالے کے لیے بھی خصوصی سہولت متعارف کرائی گئی، جبکہ مصنوعی ذہانت سے لیس ورچوئل اسسٹنٹ ’’تالا‘‘ کے ذریعے شہری 17 مقامی زبانوں، انگریزی اور فلپائنی زبان میں رہنمائی حاصل کر سکتے ہیں۔
فلپائنی حکام کے مطابق اس اقدام کا بنیادی مقصد بیرون ملک مقیم شہریوں کو اپنے وطن کی سرکاری خدمات ان کی دہلیز کے قریب فراہم کرنا، ان کے مسائل حل کرنا اور فلاحی سہولیات تک رسائی کو آسان بنانا ہے۔