علم، ثقافت اور ترقی کا نیا سنگ میل، الدار اور شیخ محمد بن خالد النہیان کلچرل سینٹر میں 3 سالہ شراکت داری

ابوظہبی (جانب منزل نیوز) متحدہ عرب امارات میں علم و ادب، ثقافتی سرگرمیوں اور معاشرتی ترقی کے فروغ کے لیے ایک اور خوش آئند قدم اٹھا لیا گیا۔ الدار اور شیخ محمد بن خالد النہیان کلچرل سینٹر کے درمیان تین سالہ شراکت داری کا معاہدہ طے پاگیا، جس کے تحت ملازمین، خاندانوں، طلبہ اور رہائشی کمیونٹیز کو علم و ثقافت سے جوڑنے کے لیے وسیع پیمانے پر اقدامات کیے جائیں گے۔
معاہدے کا بنیادی مقصد مطالعے کا شوق بیدار کرنا، علمی مکالمے کو فروغ دینا، نئی صلاحیتوں کو سامنے لانا اور اماراتی ثقافت و قومی شناخت کو مزید مستحکم بنانا ہے۔
معاہدے پر ابوظبی کے علاقے البطین میں واقع شیخ محمد بن خالد النہیان پیلس میں دستخط کیے گئے۔ تقریب میں شیخہ شما بنت محمد بن خالد النہیان اور الدار کی چیف پیپل اینڈ کمیونیکیشنز آفیسر بیان الحسنی بھی شریک ہوئیں۔
شراکت داری کے تحت الدار ملازمین کے لیے خصوصی ریڈنگ اینڈ کلچرل ڈائیلاگ کونسل قائم کی جائے گی، جہاں مطالعے، علمی تبادلے اور فکری مکالمے کو فروغ ملے گا۔ ملازمین کی پیشہ ورانہ، ذاتی اور سماجی صلاحیتیں نکھارنے کے لیے تربیتی پروگرام بھی شروع کیے جائیں گے۔
اس تعاون کا دائرہ تعلیمی اداروں اور اسکولوں تک بھی پھیلایا جائے گا، جہاں نوجوانوں کو اپنے خیالات پیش کرنے، ثقافتی سرگرمیوں میں حصہ لینے اور کمیونٹی منصوبوں کی تشکیل میں کردار ادا کرنے کے مواقع فراہم ہوں گے۔ خاندانوں کے لیے آگاہی اور تعلیمی پروگرام بھی اس منصوبے کا حصہ ہوں گے۔
شراکت داری کے تحت مقامی کاروباری افراد اور چھوٹے و درمیانے درجے کے کاروباروں کو بھی کمیونٹی سرگرمیوں میں شرکت کے مواقع ملیں گے۔ اس کے علاوہ پانی و بجلی کی بچت، توانائی کے مؤثر استعمال، ذمہ دارانہ خریداری اور کچرے میں کمی کے حوالے سے آگاہی مہمات چلائی جائیں گی۔