یو اے ای میں نومبر کا آغاز، نئے قوانین اور اہم سہولتیں نافذ

دبئی (جانِب منزل نیوز) متحدہ عرب امارات میں نومبر 2026 کا آغاز اہم تبدیلیوں اور نئی سہولتوں کے ساتھ ہوگیا۔ دبئی میں پانچ اہم سڑکوں پر رفتار کی حدیں تبدیل، جانوروں کے علاج میں مخصوص اینٹی بائیوٹک کے استعمال پر پابندی نافذ جبکہ ابوظہبی میں اتحاد ریل کے دو نئے مسافر اسٹیشن رواں ماہ کھولے جائیں گے۔
دبئی میں یکم نومبر سے پانچ اہم شاہراہوں پر رفتار کی نئی حدیں نافذ کردی گئی ہیں۔ الرباط اسٹریٹ پر رفتار 100 سے کم کرکے 90 کلومیٹر فی گھنٹہ جبکہ شیخ صباح الاحمد الجابر الصباح اسٹریٹ پر 80 سے کم کرکے 70 کلومیٹر فی گھنٹہ کردی گئی ہے۔
دوسری جانب العسیل اسٹریٹ پر رفتار 60 سے بڑھا کر 80، المستقبل اسٹریٹ اور لطیفہ بنت حمدان اسٹریٹ پر 60 سے بڑھا کر 70 کلومیٹر فی گھنٹہ مقرر کی گئی ہے۔
متحدہ عرب امارات میں جانوروں کے علاج کے لیے سیپروفلوکساسین نامی اینٹی بائیوٹک کے استعمال پر یکم نومبر سے ملک گیر پابندی نافذ ہوگئی ہے۔ اقدام کا مقصد اینٹی مائیکروبیل مزاحمت کی روک تھام اور ادویات کے ذمہ دارانہ استعمال کو فروغ دینا ہے۔
دبئی میں 2026-27 کا سرمائی کیمپنگ سیزن یکم نومبر سے شروع ہوکر 30 اپریل 2027 تک جاری رہے گا۔ رواں سال کیمپنگ مقامات کی تعداد بڑھا کر 600 کردی گئی ہے جبکہ کاروان پلاٹس اور روزانہ کرائے پر کیمپنگ کی نئی سہولتیں بھی متعارف کرائی گئی ہیں۔
ابوظہبی کے علاقے الظفرہ میں سفری سہولتوں کو مزید بہتر بنانے کے لیے اتحاد ریل کے دو نئے مسافر اسٹیشن زاید سٹی اور لیوا میں 30 نومبر کو کھولے جانے کا اعلان کیا گیا ہے۔ نئے اسٹیشنز سے مغربی ابوظہبی میں آمدورفت اور علاقائی رابطوں میں بہتری آئے گی۔
متحدہ عرب امارات میں 3 نومبر کو فلیگ ڈے قومی جوش و جذبے کے ساتھ منایا جائے گا۔ سرکاری اداروں، اسکولوں، دفاتر اور مختلف کمیونٹیز میں پرچم کشائی کی تقریبات منعقد ہوں گی۔ فلیگ ڈے قومی اتحاد اور حب الوطنی کی علامت ہے، تاہم اس موقع پر معمول کے کاروباری اور دفتری امور جاری رہیں گے۔
دبئی فٹنس چیلنج 29 نومبر تک جاری رہے گا جبکہ دبئی رائیڈ یکم نومبر کو شیخ زاید روڈ پر منعقد ہوگی۔ ابوظہبی میں 2 سے 5 نومبر تک عالمی توانائی نمائش ADIPEC 2026 منعقد ہوگی۔
دبئی ڈیزائن ویک 3 سے 8 نومبر، شارجہ انٹرنیشنل بک فیئر 4 سے 15 نومبر اور دبئی رَن 22 نومبر کو شیڈول ہے۔ دبئی انٹرنیشنل بوٹ شو 25 سے 29 نومبر تک دبئی ہاربر میں منعقد ہوگا جبکہ ابوظہبی کا مدر آف دی نیشن فیسٹیول 28 نومبر سے شروع ہوکر جنوری 2027 تک جاری رہے گا۔
متحدہ عرب امارات میں نومبر کے دوران ہونے والی یہ تبدیلیاں شہریوں، رہائشیوں اور سیاحوں کے لیے سفری سہولتوں، تفریحی سرگرمیوں اور روزمرہ زندگی میں اہم پیش رفت قرار دی جارہی ہیں۔