غزہ کے لیے شارجہ سے 140 ٹن امدادی سامان روانہ کرنے کی تیاری مکمل

شارجہ (جانب منزل نیوز ) متحدہ عرب امارات کی جانب سے فلسطینی عوام کی امداد کا سلسلہ جاری ہے۔ شارجہ چیریٹی انٹرنیشنل نے آپریشن گیلنٹ نائٹ 3 کے تعاون سے غزہ کے متاثرہ خاندانوں کے لیے تقریباً 140 ٹن امدادی سامان کی کھیپ تیار کرلی ہے، جو خصوصی کارگو طیارے کے ذریعے غزہ بھیجی جائے گی۔
امدادی سامان میں بچوں، خواتین اور مردوں کے لیے گرم ملبوسات، خوراک، کمبل اور سردی سے بچاؤ کی دیگر ضروری اشیا شامل ہیں۔ شارجہ چیریٹی انٹرنیشنل کے چیئرمین شیخ صقر بن محمد القاسمی نے شارجہ انٹرنیشنل ایئرپورٹ کے کارگو ولیج میں امدادی سامان کی تیاری کا معائنہ کیا۔
انہوں نے کہا کہ ’وارم ونٹر فار غزہ‘ مہم کا مقصد موسم سرما میں فلسطینی خاندانوں کی ضروریات پوری کرنا اور ان کی مشکلات کم کرنے میں مدد فراہم کرنا ہے۔
ادارے کے ایگزیکٹو ڈائریکٹر عبداللہ سلطان بن خادم کے مطابق شارجہ چیریٹی انٹرنیشنل تقریباً 50 ہزار گرم ملبوسات کے علاوہ کمبل اور دیگر ضروری سامان بھی فراہم کررہی ہے۔
حکام کے مطابق متحدہ عرب امارات اب تک غزہ کے لیے 136 ہزار ٹن سے زائد انسانی امداد فراہم کرچکا ہے، جس کی مجموعی مالیت تقریباً 4.3 ارب ڈالر ہے۔ امدادی سرگرمیوں کا مقصد متاثرہ فلسطینی عوام بالخصوص بچوں، خواتین اور بزرگوں کو بنیادی ضروریات کی فراہمی یقینی بنانا ہے۔