بابر اعظم سپر اسٹار ہیں، ان کے خلاف تنقید میں حسد اور ذاتی مفادات شامل نہ کیے جائیں: عماد وسیم

لاہور (جانِب منزل نیوز) سابق پاکستانی آل راؤنڈر عماد وسیم نے قومی کرکٹ اسٹار بابر اعظم پر ہونے والی تنقید پر ردعمل دیتے ہوئے کہا ہے کہ بابر اعظم پاکستان کے سپر اسٹار اور بہترین ون ڈے بیٹرز میں سے ایک ہیں، ان کی گزشتہ ایک دہائی کی کارکردگی اور کامیابیوں کو نظرانداز نہیں کیا جانا چاہیے۔
عماد وسیم نے سماجی رابطے کی ویب سائٹ ایکس پر اپنے بیان میں کہا کہ بابر اعظم کو اپنے ہی شائقین اور سابق کرکٹرز کی جانب سے جس شدت سے تنقید کا سامنا ہے، وہ سمجھ سے بالاتر ہے۔
عماد وسیم کا کہنا تھا کہ کسی بھی کھلاڑی کی فارم، تکنیک اور کارکردگی کا تجزیہ کرنا کرکٹ کا حصہ ہے اور کوئی بھی کھلاڑی تنقید سے بالاتر نہیں۔
تاہم ذاتی مفادات، حسد اور کردار کشی کو کرکٹ تجزیے کا نام دینا مناسب نہیں۔ بابر اعظم جیسے قومی اسٹارز کو مشکل وقت میں نیچا دکھانے کے بجائے ان کی کمزوریوں کی نشاندہی کرکے مثبت تجاویز دی جانی چاہئیں۔
پاکستان نے انگلینڈ اور سری لنکا کے خلاف ون ڈے سہ ملکی سیریز جیت لی، تاہم بابر اعظم کی بیٹنگ فارم بدستور زیر بحث ہے۔
سری لنکا کے خلاف فائنل میں بابر اعظم بغیر کوئی رن بنائے آؤٹ ہوگئے، لیکن پاکستان نے فخر زمان کی شاندار 127 رنز کی اننگز کی بدولت تین وکٹوں سے کامیابی حاصل کی۔
عماد وسیم نے زور دیا کہ پاکستان کو اپنے اسٹار کھلاڑیوں کی حوصلہ افزائی کرنی چاہیے، نہ کہ مشکل وقت میں انہیں تنقید کا نشانہ بنا کر ان کی سابقہ کامیابیوں کو فراموش کردیا جائے۔
ان کا کہنا تھا کہ تنقید کرکٹ کا حصہ ہے، لیکن کھلاڑی کی ماضی کی خدمات اور کامیابیوں کا احترام بھی ضروری ہے۔ بابر اعظم کو بھی اپنی بہترین فارم میں واپسی کے لیے جلد نمایاں کارکردگی دکھانا ہوگی۔