سعودی عرب میں انسدادِ بدعنوانی مہم، 174 سرکاری ملازمین گرفتار

ریاض (جانب منزل نیوز) سعودی عرب میں سرکاری اداروں میں شفافیت اور احتساب یقینی بنانے کے لیے انسدادِ بدعنوانی کی کارروائیاں تیز کردی گئی ہیں۔ سعودی ادارے نزاھہ کے مطابق گزشتہ ماہ مختلف سرکاری محکموں میں کارروائیوں کے دوران 174 افراد کو گرفتار کیا گیا جبکہ 454 مشتبہ افراد سے تحقیقات کی گئیں۔
ادارے کی جانب سے گزشتہ ماہ کے دوران مختلف سرکاری محکموں میں 2 ہزار 662 انسپکشن وزٹس کیے گئے۔ اس دوران رشوت ستانی، سرکاری اختیارات کے ناجائز استعمال اور دیگر مبینہ بدعنوانی کے معاملات کی تحقیقات کی گئیں۔
تحقیقات میں وزارت داخلہ، وزارت تعلیم، وزارت تجارت اور وزارت بلدیات و ہاؤسنگ سمیت متعدد سرکاری اداروں کے ملازمین شامل ہیں۔
نزاھہ کے مطابق گرفتار افراد میں سے بعض کو ضمانت پر رہا کردیا گیا ہے جبکہ دیگر کے خلاف قانونی کارروائی جاری ہے۔
ادارے نے عزم ظاہر کیا ہے کہ سرکاری اداروں میں شفافیت، دیانت داری اور جوابدہی کے فروغ کے لیے نگرانی اور تحقیقات کا سلسلہ جاری رکھا جائے گا اور بدعنوانی میں ملوث ثابت ہونے والوں کے خلاف قانون کے مطابق کارروائی ہوگی۔