آئرلینڈ کی اولمپک ایتھلیٹ سائرہ میگیان 34 برس کی عمر میں چل بسیں

آئرلینڈ (جانب منزل نیوز) آئرلینڈ کی معروف اولمپک ایتھلیٹ اور درمیانی فاصلے کی رنر سائرہ میگیان 34 برس کی عمر میں انتقال کر گئیں۔ ان کے اہل خانہ نے اتوار کو سوشل میڈیا کے ذریعے ان کی وفات کی تصدیق کی۔
خاندانی بیان کے مطابق سائرہ میگیان نے صبح ساڑھے چھ بجے اپنے پیاروں کی موجودگی میں آخری سانس لی۔ وہ آنتوں کے کینسر میں مبتلا تھیں، جس کی تشخیص جولائی 2025 میں ہوئی تھی۔ بعد ازاں انہوں نے بتایا تھا کہ بیماری آخری مراحل میں داخل ہو چکی ہے۔
سائرہ میگیان نے 2016 کے ریو اور 2021 کے ٹوکیو اولمپکس میں آئرلینڈ کی نمائندگی کی۔ ان کے کھیلوں کے کیریئر کی سب سے بڑی کامیابی 2024 میں روم میں ہونے والی یورپی ایتھلیٹکس چیمپئن شپ میں 1500 میٹر ریس کا گولڈ میڈل جیتنا تھا۔
سائرہ میگیان 2022 کی یورپی چیمپئن شپ میں سلور اور 2016 میں برونز میڈل بھی حاصل کر چکی تھیں، جبکہ 2022 کے کامن ویلتھ گیمز میں 1500 میٹر ریس میں دوسری پوزیشن حاصل کی تھی۔
ایڑی کی انجری کے باعث وہ پیرس اولمپکس 2024 میں شرکت نہ کر سکیں۔ بیماری کے دوران بھی انہوں نے غیر معمولی حوصلے اور مثبت سوچ کا مظاہرہ کیا۔ ان کی وفات سے چند ہفتے قبل بیلفاسٹ میں ان کی اپنے دیرینہ ساتھی سے شادی ہوئی تھی۔
آئرلینڈ کے اولمپک فیڈریشن نے انہیں قومی ہیرو قرار دیتے ہوئے خراج عقیدت پیش کیا، جبکہ شمالی آئرلینڈ کی فرسٹ منسٹر مشیل اونیل اور آئرش وزیراعظم مائیکل مارٹن نے بھی ان کے انتقال پر گہرے دکھ کا اظہار کیا۔