نئے سال پر ابوظہبی میں دلجیت دوسانجھ کا میگا کنسرٹ

ابوظہبی (خصوصی رپورٹ) پنجابی موسیقی کے عالمی شہرت یافتہ گلوکار اور اداکار دلجیت دوسانجھ نئے سال کی آمد پر ابوظہبی میں موسیقی کا رنگ جمانے کے لیے تیار ہیں۔ گلوکار 31 دسمبر 2026 کو یاس آئی لینڈ کے اتحاد لائیو میں اپنے ریکارڈ ساز AURA ورلڈ ٹور کے تحت خصوصی کنسرٹ پیش کریں گے۔
اس کنسرٹ کی سب سے بڑی خاص بات یہ ہے کہ مشرق وسطیٰ میں ان کے عالمی دورے کا واحد شو ابوظہبی میں منعقد ہوگا۔ نئے سال کی اس خصوصی تقریب میں دلجیت اپنی مقبول پرفارمنس کے ذریعے شائقین کو محظوظ کریں گے، جبکہ آدھی رات کی الٹی گنتی اور خصوصی سرپرائزز کے ساتھ سال 2027 کا استقبال کیا جائے گا۔
دلجیت دوسانجھ کا ورلڈ ٹور پانچ براعظموں کے 15 ممالک اور 40 شہروں تک پھیلا ہوا ہے، جس میں سڈنی، نیویارک، لندن، ممبئی اور دہلی جیسے بڑے شہر شامل ہیں۔
عالمی موسیقی کے میدان میں دلجیت کئی نمایاں اعزازات اپنے نام کر چکے ہیں۔ وہ آسٹریلیا میں اسٹیڈیم کنسرٹس مکمل طور پر فروخت کرنے والے پہلے پنجابی فنکار بنے، جہاں 90 ہزار سے زائد شائقین نے ان کی پرفارمنس دیکھی۔ 12 ستمبر 2026 کو لندن کے تاریخی ویمبلے اسٹیڈیم میں پرفارم کرکے بھی انہوں نے تاریخ رقم کی۔
دلجیت 2023 میں کوچیلا میوزک فیسٹیول میں پرفارم کرنے والے پہلے بھارت میں پیدا ہونے والے فنکار بھی بنے۔ ان کے مقبول گانے G.O.A.T، Lover اور Proper Patola دنیا بھر میں بے حد مقبول ہیں اور مجموعی طور پر 70 کروڑ سے زائد ویوز حاصل کر چکے ہیں۔
کنسرٹ کے عام ٹکٹ 7 نومبر 2026 کو متحدہ عرب امارات کے وقت کے مطابق دوپہر 12 بجے فروخت کے لیے پیش کیے جائیں گے۔ مخصوص کریڈٹ کارڈ صارفین کے لیے 5 نومبر سے پری سیل شروع ہوگی، جبکہ یاس آئی لینڈ کے سالانہ پاس ہولڈرز 6 نومبر سے خصوصی پری سیل کے ذریعے ٹکٹ حاصل کر سکیں گے۔
دلجیت دوسانجھ کی یہ خصوصی پرفارمنس ابوظہبی کی نئے سال کی تقریبات کو مزید یادگار بنانے جا رہی ہے، جہاں پنجابی موسیقی کے دیوانے سال 2026 کو الوداع کہتے ہوئے نئے سال کا استقبال کریں گے۔