ٹائیگر شروف پر حملہ، بشنوئی گینگ ممبئی میں داؤد ابراہیم جیسا خوف قائم کرنا چاہتا ہے، پولیس کا انکشاف

ممبئی (جانب منزل نیوز) بھارتی کرائم برانچ کی تحقیقات میں انکشاف ہوا ہے کہ لارنس بشنوئی گینگ بالی ووڈ اداکار ٹائیگر شروف کی گاڑی پر فائرنگ کے واقعے کے ذریعے ممبئی میں اپنی بالادستی قائم کرنے اور داؤد ابراہیم کے سابقہ دور جیسا خوف پیدا کرنے کی کوشش کر رہا ہے۔
ممبئی پولیس کے مطابق گینگ کا مبینہ مقصد شہر میں اپنا اثر و رسوخ بڑھانا اور انڈر ورلڈ کی پرانی طرز پر خوف و ہراس پھیلانا ہے، تاکہ کاروباری شخصیات، بلڈرز اور فلمی صنعت سے وابستہ افراد کو دھمکیاں دے کر بھاری رقوم وصول کی جاسکیں۔
پولیس حکام کا کہنا ہے کہ گینگ مبینہ طور پر 1990 کی دہائی میں ممبئی انڈر ورلڈ سے وابستہ خوف کی فضا دوبارہ پیدا کرنا چاہتا ہے، جب ایک فون کال ہی کاروباری شخصیات اور فلمی ستاروں کے لیے پریشانی کا باعث بن جاتی تھی۔
ٹائیگر شروف کی گاڑی پر فائرنگ کے واقعے میں اب تک 12 افراد کو گرفتار کیا جاچکا ہے۔ تحقیقات کے دوران کرائم برانچ نے بعض اہم آڈیو ریکارڈنگز بھی حاصل کی ہیں، جن میں مبینہ طور پر انڈر ورلڈ سے وابستہ شخصیات کا ذکر موجود ہے۔
پولیس ان ریکارڈنگز کی فرانزک جانچ کروا رہی ہے تاکہ گینگ کے نیٹ ورک، مبینہ منصوبہ بندی اور دیگر افراد کے کردار کا تعین کیا جاسکے۔
تحقیقاتی اداروں کا خیال ہے کہ بشنوئی گینگ ممبئی کے روایتی جرائم پیشہ گروہوں کو چیلنج کرکے شہر میں اپنا اثر و رسوخ بڑھانا چاہتا ہے۔
پولیس نے مبینہ نیٹ ورک کو ختم کرنے اور مزید مجرمانہ سرگرمیوں کی روک تھام کے لیے کارروائیاں تیز کردی ہیں۔ حکام کے مطابق واقعے کے تمام پہلوؤں کا جائزہ لیا جارہا ہے جبکہ مزید تحقیقات جاری ہیں۔