ریمی ٹومی کو مل گیا اپنا ہمسفر، شادی کی تیاریاں شروع

انڈیا (جانب منزل میوز) بھارتی ملیالم فلم انڈسٹری کی معروف گلوکارہ اور ٹی وی میزبان ریمی ٹومی نے جلد شادی کرنے کا اعلان کردیا۔ گلوکارہ کا کہنا ہے کہ 2026 میں ایک خاص شخص ان کی زندگی میں آیا، جس کے ساتھ انہوں نے مستقبل کے حوالے سے اہم فیصلہ کیا ہے۔
ریمی ٹومی نے اپنے یوٹیوب چینل پر جاری ویڈیو میں بتایا کہ اہل خانہ ہمیشہ ان کے ساتھ رہے، تاہم زندگی میں شریکِ حیات کی کمی محسوس ہوتی تھی، جو اب پوری ہوگئی ہے۔
گلوکارہ نے اپنے ہونے والے شریکِ حیات کے بارے میں دلچسپ انکشاف کرتے ہوئے کہا کہ وہ نہ اداکار ہیں، نہ گلوکار، نہ کوئی معروف شخصیت اور نہ ہی کروڑ پتی ہیں۔ انہوں نے وعدہ کیا کہ جلد اپنے ہونے والے شوہر کی شناخت اور پیشے سے متعلق تفصیلات بھی مداحوں کے ساتھ شیئر کریں گی۔
ریمی ٹومی کے مطابق وہ ایک ایسے شخص کی خواہاں تھیں جس کے ساتھ خوشگوار اور پُرسکون زندگی گزاری جاسکے۔ دونوں نے ایک دوسرے کی خوبیوں اور خامیوں کو سمجھنے کے بعد زندگی کے نئے سفر کا فیصلہ کیا ہے۔
گلوکارہ نے اپنے جذبات کا اظہار کرتے ہوئے کہا کہ انہیں یہ رشتہ خدا کی طرف سے تحفہ محسوس ہوتا ہے اور وہ زندگی کے اس نئے باب میں پُرامید ہیں۔ ان کے مطابق شادی جلد متوقع ہے، تاہم حتمی تاریخ کا فیصلہ وقت آنے پر کیا جائے گا۔
ریمی ٹومی نے 2002 میں ملیالم فلم میسا مادھاون کے گیت سے پلے بیک سنگنگ کا آغاز کیا اور اپنی منفرد آواز، پُرجوش پرفارمنس اور ٹی وی میزبانی کے باعث شہرت حاصل کی۔
انہوں نے 2008 میں کاروباری شخصیت روائس سے شادی کی تھی، تاہم 2019 میں دونوں کی قانونی طور پر طلاق ہوگئی تھی۔