بینک اسلامی اور ماسٹرکارڈ میں ڈیجیٹل بینکاری کے فروغ کا معاہدہ

کراچی (جانب منزل نیوز) بینک اسلامی پاکستان اور ماسٹرکارڈ نے ملک میں ڈیجیٹل ادائیگیوں کے نظام کو مضبوط بنانے اور بینکاری سہولیات میں توسیع کے لیے شراکت داری کا معاہدہ کیا ہے۔ اس اشتراک کے تحت بینک اسلامی انفرادی صارفین، چھوٹے اور درمیانے درجے کے کاروباری اداروں اور کمرشل صارفین کے لیے ڈیبٹ، کریڈٹ اور بزنس کارڈز کی متنوع سہولیات متعارف کرائے گا۔
معاہدے کے تحت ترجیحی بینکاری کے صارفین کے لیے ماسٹرکارڈ ورلڈ اور ورلڈ ایلیٹ کارڈز پر مبنی پروگرام بھی شامل ہوں گے، جبکہ شرعی اصولوں کے مطابق کارڈز اور ادائیگیوں کی سہولیات کو مزید وسعت دی جائے گی۔ اس اقدام سے کاروباری اداروں کو ادائیگیوں کے بہتر انتظام، مالیاتی امور کی مؤثر نگرانی اور سپلائی چین کے عمل کو بہتر بنانے میں مدد ملے گی۔
شراکت داری کے تحت ماسٹرکارڈ، بینک اسلامی کے کارڈ پورٹ فولیو کے لیے یکساں لائلٹی پلیٹ فارم کے آغاز میں بھی معاونت فراہم کرے گا، جس سے صارفین کو انعامات اور مختلف فوائد حاصل ہوں گے۔
بینک اسلامی کے صدر اور چیف ایگزیکٹو آفیسر عمران ایچ شیخ نے کہا کہ ماسٹرکارڈ کے ساتھ اشتراک شرعی اصولوں کے مطابق مالیاتی سہولیات کو جدید ڈیجیٹل بینکاری کی ضروریات سے ہم آہنگ کرنے میں اہم کردار ادا کرے گا۔
ماسٹرکارڈ کے کنٹری منیجر برائے پاکستان و افغانستان ارسلان خان کے مطابق اس شراکت داری سے صارفین اور چھوٹے کاروباری اداروں کے لیے ڈیجیٹل ادائیگیوں کے مزید مواقع پیدا ہوں گے اور پاکستان میں ڈیجیٹل معیشت کے فروغ میں مدد ملے گی۔