لندن (جانب منزل نیوز)برطانوی سیاست میں سمندر پار پاکستانیوں نے ایک بار پھر تاریخ رقم کر دی ۔ سابق گورنر پنجاب چوہدری محمد سرور کے صاحبزادے اور اسکاٹش لیبر پارٹی کے سابق سربراہ انس سرور نے برطانوی کابینہ میں باقاعدہ طور پر وزیرِ تجارت کا حلف اٹھا لیا ہے، جس پر دنیا بھر میں مقیم پاکستانیوں کا سر فخر سے بلند ہو گیا ہے۔
اس اہم ترین حکومتی عہدے کو سنبھالنے کے لیے انس سرور کو برطانیہ کے باوقار ایوانِ بالا ہاوس آف لارڈز کی مستقل رکنیت بھی تفویض کی گئی ہے، جہاں انہوں نے روایتی سرخ چغہ پہن کر بادشاہ سے وفاداری کا حلف اٹھایا۔
اس نئی ذمہ داری کے بعد وہ برطانیہ کے تینوں بڑے پارلیمانی اداروں (ہاؤس آف کامنز، اسکاٹش پارلیمنٹ اور ہاؤس آف لارڈز) میں خدمات سرانجام دینے والے پہلے پاکستانی نژاد سیاست دان بن گئے ہیں۔
اس شاندار کامیابی پر برطانیہ اور پاکستان کے سیاسی حلقوں کی جانب سے چوہدری سرور کے خاندان کو مبارکباد دینے کا سلسلہ جاری ہے اور اسے عالمی سطح پر پاکستانیوں کی بڑھتی ہوئی سیاسی طاقت کی ایک بڑی علامت قرار دیا جا رہا ہے۔
