ریاض (جانب منزل نیوز)سعودی عرب میں 7 دن کے دوران اقامہ، لیبر اور بارڈر سکیورٹی کی مزید 14 ہزار 434 خلاف ورزیاں ریکارڈ کی گئی ہیں اور 12 ہزار 363 غیر قانونی تارکین کو ان کے ملک واپس بھیج دیا گیا ہے۔
سعودی وزارت داخلہ کے مطابق 27 اگست سے 2 ستمبر کے درمیان مجموعی طور پر 7 ہزار121 اقامہ قانون، 3 ہزار 636 بارڈر سکیورٹی اور 3 ہزار 408 لیبر قوانین کی خلاف ورزیاں ریکارڈ کی گئیں،غیر قانونی طور پر داخل ہونے کی کوشش پر ایک ہزار 315 افراد کو حراست میں لیا گیا، ان میں 58 فیصد ایتھوپین، 41 فیصد یمنی اور ایک فیصد دیگر ممالک سے تعلق رکھتے ہیں۔
حکام کا کہنا ہے کہ مزید 42 ایسے افراد کو بھی پکڑا گیا جو سرحد پار کر کے مملکت سے ہمسایہ ممالک میں داخل ہونے کی کوشش کر رہے تھے، سفر، رہائش، روزگار اور پناہ دینے کی کوششوں میں ملوث 21 افراد کو بھی گرفتار کرلیا گیا۔جو بھی شخص غیر قانونی تارکین کو سعودی عرب میں داخل ہونے کی سہولت فراہم کرے گا اسے 15 سال قید اور 10 لاکھ ریال تک جرمانے کے ساتھ گاڑی اور جائیداد کی ضبطگی کی سزا کا سامنا کرنا پڑ سکتا ہے۔
