ابوظہبی اسلامک بینک کا 1.75 ارب درہم کا بڑا سرمایہ کاری منصوبہ

ابوظہبی (جانب منزل نیوز) متحدہ عرب امارات کے معروف مالیاتی ادارے ابوظہبی اسلامک بینک (ADIB) نے 1.75 ارب درہم (476 ملین ڈالر) کے رائٹس ایشو کے ذریعے سرمایہ بڑھانے کا فیصلہ کیا ہے، جس کے تحت شیئر ہولڈرز 10 سے 24 نومبر 2026 تک نئے شیئرز خریدنے کے لیے درخواست دے سکیں گے۔
بینک کے مطابق 2 نومبر کو رجسٹرڈ شیئر ہولڈرز کو ہر 34.14 موجودہ شیئرز کے بدلے ایک رائٹ دیا گیا ہے۔ ہر رائٹ کے ذریعے 16.45 درہم میں ایک نیا شیئر خریدا جا سکے گا۔ مثال کے طور پر 3,414 شیئرز رکھنے والے سرمایہ کار کو 100 رائٹس ملیں گے، جنہیں مکمل استعمال کرنے کے لیے 1,645 درہم درکار ہوں گے۔
سرمایہ کار ابوظہبی سیکیورٹیز ایکسچینج کے ای پورٹل، ADIB کی منتخب برانچوں اور موبائل ایپ کے ذریعے درخواست دے سکیں گے۔ رائٹس کی ٹریڈنگ 16 نومبر تک جاری رہے گی، جبکہ نئے شیئرز کی باقاعدہ خرید و فروخت 18 دسمبر سے متوقع ہے۔
اس منصوبے کے تحت 10 کروڑ 63 لاکھ 83 ہزار نئے شیئرز جاری کیے جائیں گے، جس سے بینک کا مجموعی جاری شدہ سرمایہ 3.632 ارب درہم سے بڑھ کر 3.738 ارب درہم ہو جائے گا۔
ADIB کے مطابق رائٹس ایشو سے حاصل ہونے والی رقم بینک کی ویژن 2035 حکمت عملی کو آگے بڑھانے اور مالیاتی بنیاد مزید مستحکم بنانے پر خرچ کی جائے گی۔ جون 2026 کے اختتام پر بینک کے مجموعی اثاثوں کی مالیت 304 ارب درہم ریکارڈ کی گئی تھی۔