جنوبی افریقہ نے آسٹریلیا کو 176 رنز سے شکست دے کر ٹیسٹ سیریز جیت لی

کیپ ٹاؤن (جانب منزل نیوز) جنوبی افریقہ نے تیسرے اور فیصلہ کن ٹیسٹ میچ میں آسٹریلیا کو 176 رنز سے شکست دے کر ٹیسٹ سیریز اپنے نام کرلی۔ نیولینڈز میں میچ کے پانچویں روز آسٹریلوی ٹیم 111 رنز پر آل آؤٹ ہوگئی۔
جنوبی افریقہ کے فاسٹ بولر کاگیسو ربادا نے آخری روز شاندار بولنگ کرتے ہوئے ابتدائی تین وکٹیں حاصل کیں، جبکہ آف اسپنر سائمن ہارمر نے 16 رنز کے عوض 6 وکٹیں حاصل کرکے آسٹریلوی بیٹنگ لائن کو تہس نہس کردیا۔
آسٹریلیا کو میچ جیتنے کے لیے 288 رنز درکار تھے، تاہم جنوبی افریقی بولرز کے سامنے آسٹریلوی بلے باز زیادہ دیر وکٹ پر نہ ٹھہر سکے۔ ربادا کی ابتدائی تباہ کن بولنگ کے بعد ہارمر نے بھی مسلسل وکٹیں حاصل کرکے جنوبی افریقہ کی فتح یقینی بنائی۔
اس کامیابی کے ساتھ دفاعی عالمی ٹیسٹ چیمپئن جنوبی افریقہ نے سیریز بھی اپنے نام کرلی۔ تینوں ٹیسٹ میچوں کے پانچویں روز نتیجہ سامنے آنے والی اس دلچسپ سیریز کے بعد جنوبی افریقہ کی آئی سی سی ٹیسٹ رینکنگ میں پہلی پوزیشن پر پہنچنے کی راہ بھی ہموار ہوگئی۔