پانی کی ایک ایک بوند اہم، ابوظہبی میں عالمی مستقبل کے لیے بڑا اجلاس

ابوظہبی (جانب منزل نیوز) پانی کے تحفظ کو عالمی امن، ترقی اور خوشحالی کی ضمانت قرار دیتے ہوئے متحدہ عرب امارات نے دنیا بھر کے ممالک کو مشترکہ جدوجہد کی دعوت دے دی۔ ابوظبی میں دسمبر کے دوران اقوام متحدہ کی عالمی واٹر کانفرنس منعقد ہوگی، جس میں پانی کے بڑھتے ہوئے مسائل کا پائیدار حل تلاش کرنے کے لیے عالمی قیادت ایک پلیٹ فارم پر جمع ہوگی۔
صدر متحدہ عرب امارات کے سفارتی مشیر ڈاکٹر انور قرقاش نے اپنے پیغام میں کہا ہے کہ پانی کا تحفظ دنیا کو درپیش اہم ترین چیلنجز میں شامل ہے اور اس کے حل کے لیے عالمی سطح پر تعاون ناگزیر ہے۔ ان کا کہنا تھا کہ پانی کی دستیابی اور اس کے بہتر انتظام کو یقینی بنانا ایک محفوظ اور خوشحال مستقبل کی بنیادی ضرورت ہے۔
انور قرقاش کے مطابق متحدہ عرب امارات کی جانب سے اس عالمی کانفرنس کی میزبانی بین الاقوامی شراکت داری، جدید ٹیکنالوجی اور پائیدار حل کے فروغ کے عزم کا مظہر ہے۔
متحدہ عرب امارات اور سینیگال کی مشترکہ میزبانی میں اقوام متحدہ کی 2026 واٹر کانفرنس 8 سے 10 دسمبر تک ابوظبی میں منعقد ہوگی۔ کانفرنس میں عالمی رہنما، پالیسی ساز اور بین الاقوامی ادارے شرکت کریں گے۔
اجلاس میں 2030 تک ہر انسان کے لیے صاف پانی اور نکاسی آب کی سہولیات یقینی بنانے کے عالمی ہدف پر پیش رفت تیز کرنے، پانی کے شعبے میں سرمایہ کاری بڑھانے اور جدید و مؤثر منصوبوں پر تبادلہ خیال کیا جائے گا۔
کانفرنس کا مقصد محض مسائل کی نشاندہی نہیں بلکہ ایسے عملی اقدامات اور بین الاقوامی شراکت داری کو فروغ دینا ہے جو آنے والی نسلوں کے لیے پانی کی دستیابی اور محفوظ مستقبل کی بنیاد بن سکیں