ڈھاکا (جانب منزل نیوز) پاکستان بلائنڈ کرکٹ ٹیم نے ایشیا کپ ٹی ٹوئنٹی ٹائٹل جیت کر ایک اور شاندار کامیابی اپنے نام کرلی۔ ڈھاکا میں پاکستان اور بھارت کے درمیان فائنل مسلسل بارش کے باعث نہ ہوسکا، جس کے بعد ٹورنامنٹ کے طے شدہ قوانین کے تحت پاکستان کو چیمپئن قرار دے دیا گیا۔
گرین شرٹس نے لیگ مرحلے میں بہترین کھیل پیش کرتے ہوئے بھارت، سری لنکا اور بنگلا دیش کو شکست دی تھی، جبکہ بہتر نیٹ رن ریٹ بھی پاکستان کے حق میں رہا، جس کی بنیاد پر ٹائٹل پاکستان کے نام ہوا۔
فائنل نہ ہونے اور پاکستان کو فاتح قرار دیے جانے پر بھارتی ٹیم نے اعتراض اٹھایا، تاہم ٹورنامنٹ کی پلیئنگ کنڈیشنز کے مطابق بارش سے میچ متاثر ہونے کی صورت میں بہتر نیٹ رن ریٹ رکھنے والی ٹیم کو چیمپئن قرار دینے کا اصول پہلے سے طے تھا۔
پاکستان کو فاتح قرار دیے جانے کے بعد بھارتی ٹیم نے تقسیم انعامات کی تقریب کا بائیکاٹ کیا اور رنرز اپ ٹرافی وصول کیے بغیر اسٹیڈیم سے روانہ ہوگئی۔
یوں لیگ مرحلے میں شاندار کارکردگی اور بہتر رن ریٹ کی بدولت پاکستان بلائنڈ کرکٹ ٹیم ایشیا کے کرکٹ تاج پر قابض ہوگئی۔





