دبئی (جانب منزل نیوز) مسلز بنانے اور جسم کو غیر معمولی طور پر مضبوط کرنے کا جنون ایک شخص کی صحت کے لیے سنگین خطرہ بن گیا۔ 50 سالہ شخص نے باڈی بلڈنگ کے لیے ایسے طاقتور اسٹیرائیڈز استعمال کیے جو مویشیوں کی جسمانی نشوونما اور وزن بڑھانے کے لیے استعمال ہوتے ہیں، جس کے باعث اسے دل کی خطرناک بیماری سمیت متعدد طبی مسائل کا سامنا کرنا پڑا۔
طبی جریدے The New England Journal of Medicine میں شائع ہونے والی رپورٹ میں بتایا گیا ہے کہ شخص تقریباً 11 سال تک دل کی ناکامی، گردوں کے مسائل اور شدید تھکاوٹ کا شکار رہا۔ وہ طویل عرصے سے زیادہ مقدار میں مسلز بڑھانے والے اسٹیرائیڈز استعمال کر رہا تھا، تاہم اس نے ڈاکٹروں سے یہ بات چھپائے رکھی۔
اس کی استعمال کردہ ادویات میں Trenbolone بھی شامل تھا، جو مویشیوں میں پٹھوں کی نشوونما اور وزن بڑھانے کے لیے ویٹرنری میڈیسن میں استعمال کیا جاتا ہے۔
طبی مشکلات کا آغاز 39 سال کی عمر میں ہوا، جب اسے دل کی شدید ناکامی کے باعث اسپتال منتقل کرنا پڑا۔ حالت بگڑنے پر دل اور پھیپھڑوں کے افعال کو سہارا دینے والی مشین بھی استعمال کرنا پڑی۔ بعد ازاں مسلسل تھکاوٹ، بے خوابی، پیٹ اور ٹانگوں میں درد، گردوں کو نقصان اور دیگر مسائل نے بھی گھیر لیا۔
50 سال کی عمر میں سینے میں جکڑن اور ٹانگوں میں پانی جمع ہونے پر دوبارہ اسپتال پہنچنے والے شخص کے ٹیسٹوں میں دل کی خون پمپ کرنے کی صلاحیت انتہائی کم پائی گئی۔ اس موقع پر اس نے پہلی مرتبہ ڈاکٹروں کو اسٹیرائیڈز کے طویل استعمال سے آگاہ کیا۔
ڈاکٹروں نے Cardiomyopathy کی تشخیص کی، جس میں دل کے پٹھے کمزور ہوجاتے ہیں اور خون پمپ کرنے کی صلاحیت متاثر ہوتی ہے۔ طبی ٹیم کے مطابق طویل عرصے تک اسٹیرائیڈز کا غلط استعمال اس بیماری کی ممکنہ وجہ تھا۔
رپورٹ کے مصنفین نے خبردار کیا ہے کہ مسلز بنانے کے لیے طاقتور اسٹیرائیڈز کا غیر طبی استعمال دنیا بھر میں صحت کا ایک اہم مسئلہ بنتا جارہا ہے۔ 2025 میں شائع ہونے والی ایک تحقیق کے مطابق، ایسے اسٹیرائیڈز استعمال کرنے والے مردوں میں دل کے پٹھوں کی بیماری کا خطرہ تقریباً 9 گنا اور دل کی ناکامی کا خطرہ 3 گنا سے زیادہ پایا گیا۔
ماہرین نے خبردار کیا ہے کہ جسمانی ساخت بہتر بنانے کے لیے غیر محفوظ ادویات کا استعمال دل اور دیگر اعضا کو شدید نقصان پہنچا سکتا ہے، اس لیے مسلز بنانے کے شوق میں صحت کو داؤ پر لگانے سے گریز کرنا چاہیے۔





