واشنگٹن (جانب منزل نیوز) جرمن آٹو موبائل کمپنی بی ایم ڈبلیو کی تقریباً 7 لاکھ 21 ہزار گاڑیاں ممکنہ آتشزدگی کے خطرے کے باعث امریکا میں واپس منگوائی جا رہی ہیں۔ امریکی نیشنل ہائی وے ٹریفک سیفٹی ایڈمنسٹریشن (NHTSA) کے مطابق متاثرہ گاڑیوں میں ایک تکنیکی خرابی سامنے آئی ہے، جس کے باعث گاڑی کھڑی ہونے اور انجن بند ہونے کے باوجود آگ لگ سکتی ہے۔
حکام کے مطابق 2012 سے 2018 کے ماڈلز کی مجموعی طور پر 720,796 گاڑیوں میں واٹر پمپ کے الیکٹرک کنیکٹر کی سیلنگ ناقص ہونے کا مسئلہ سامنے آیا ہے۔ اس خرابی کے باعث پانی یا نمی کنیکٹر میں داخل ہوسکتی ہے، جس سے شارٹ سرکٹ اور آتشزدگی کا خطرہ پیدا ہوتا ہے۔
متاثرہ گاڑیاں 2024 میں بھی اسی نوعیت کی خرابی کے باعث واپس منگوائی گئی تھیں، تاہم مرمت کے بعد بھی آگ لگنے کے 10 واقعات رپورٹ ہوئے ہیں۔ حکام کے مطابق اب تک کسی حادثے یا جانی نقصان کی اطلاع نہیں ملی۔
بی ایم ڈبلیو نے خرابی کا مستقل حل تیار کرنے کا عمل شروع کردیا ہے۔ اس دوران مالکان کو ہدایت کی گئی ہے کہ گاڑیاں عمارتوں، گھروں اور دیگر تعمیرات سے دور کھلی جگہ پر پارک کریں۔
کمپنی دسمبر میں متاثرہ مالکان کو نوٹس جاری کرے گی، جبکہ 25 دسمبر سے گاڑیوں کے شناختی نمبر (VIN) کے ذریعے ریکال کی تفصیلات چیک کرنے کی سہولت بھی دستیاب ہوگی۔
اگرچہ یہ ریکال امریکا میں موجود گاڑیوں تک محدود ہے، تاہم پاکستان سمیت دیگر ممالک کے مالکان کو بھی مشورہ دیا جاتا ہے کہ وہ اپنی گاڑی کا ماڈل اور شناختی نمبر چیک کروانے کے لیے بی ایم ڈبلیو کے مجاز ڈیلر سے رابطہ کریں۔





