یوکرین (جانب منزل نیوز) چرنوبل جوہری پلانٹ کے قریب واقع ’’ریڈ فاریسٹ‘‘ انسانی تاریخ کی بدترین جوہری تباہی کی ایک ہولناک یادگار ہے، جہاں 1986 میں تابکاری کی شدید لہر نے ہرے بھرے جنگل کو چند ہی دنوں میں سرخی مائل بھورے رنگ میں تبدیل کر دیا تھا۔
اپریل 1986 میں چرنوبل نیوکلیئر پاور پلانٹ کے ری ایکٹر نمبر 4 میں ہونے والے دھماکے کے بعد خارج ہونے والی خطرناک تابکاری نے قریبی جنگلات کو اپنی لپیٹ میں لے لیا۔ تابکاری کی شدت اس قدر زیادہ تھی کہ پائن کے ہزاروں درخت مرجھا کر مر گئے اور ان کے پتے سرخی مائل بھورے ہو گئے، جس کے بعد یہ علاقہ ’’سرخ جنگل‘‘ کے نام سے مشہور ہوگیا۔
تباہی کے بعد متاثرہ درختوں کو کاٹ کر زمین میں دفن کیا گیا تاکہ تابکار ذرات کے پھیلاؤ کو محدود کیا جا سکے۔ کئی دہائیاں گزرنے کے باوجود اس علاقے کی مٹی میں تابکار مادوں کے اثرات موجود ہیں۔
دلچسپ امر یہ ہے کہ جہاں کبھی زندگی کا نام و نشان مٹتا دکھائی دیتا تھا، وہاں اب قدرت نے دوبارہ سبزہ اور نئی نباتات اگا دی ہیں، تاہم تابکاری کے باعث یہ جنگل آج بھی انتہائی حساس اور آلودہ علاقوں میں شمار ہوتا ہے، جہاں داخلے پر سخت پابندیاں عائد ہیں۔





