لاہور (جانب منزل نیوز) چیئرمین پاکستان علماء کونسل حافظ محمد طاہر محمود اشرفی نے حرمین شریفین پر حوثی باغیوں کے حملوں کی کوششوں پر شدید تشویش کا اظہار کرتے ہوئے کہا ہے کہ مکہ مکرمہ پر سات اور مدینہ منورہ پر چار حملوں کی کوششیں کی جا چکی ہیں، جو پوری امت مسلمہ کے لیے انتہائی تشویشناک ہیں۔
اپنے ویڈیو بیان میں مولانا طاہر اشرفی نے کہا کہ حرمین شریفین کو نشانہ بنانے کی مسلسل کوششیں کسی صورت قابل قبول نہیں۔ سعودی دفاعی افواج کی جانب سے ان حملوں کو ناکام بنانے پر اطمینان ہے اور سعودی فورسز خراج تحسین کی مستحق ہیں۔
انہوں نے بتایا کہ حالیہ حملوں میں دو بیلسٹک میزائل، تین کروز میزائل اور چار ڈرون کے ذریعے سعودی عرب کو نشانہ بنانے کی کوششیں بھی انتہائی تشویشناک ہیں۔
حافظ محمد طاہر محمود اشرفی کا کہنا تھا کہ حرمین شریفین کا تحفظ پوری امت مسلمہ کے ایمان اور عقیدے کا معاملہ ہے، اس حوالے سے کوئی سمجھوتہ نہیں کیا جا سکتا۔ حرمین شریفین کا تحفظ امت مسلمہ کی سرخ لکیر ہے۔
انہوں نے مزید کہا کہ حکومت پاکستان اور عوام حوثیوں کو دہشت گرد اور باغی تنظیم سمجھتے ہیں، جو یمن کی حکومت و عوام اور سعودی عرب کے خلاف حملہ آور ہیں۔





