لاہور (جانب منزل نیوز) امیر جماعت اسلامی پاکستان حافظ نعیم الرحمان نے کہا ہے کہ پنجاب کی آبادی پاکستان کی مجموعی آبادی کے نصف سے زیادہ ہے، اگر پنجاب جاگ جائے تو ملک بھر میں انقلاب برپا ہو سکتا ہے۔ عدل و انصاف پر مبنی نظام کا قیام ہماری ذمہ داری ہے۔
لاہور میں کل پنجاب اجتماعِ ذمہ داران سے خطاب کرتے ہوئے حافظ نعیم الرحمان نے کہا کہ پنجاب میں جو سیاسی قوت خود کو منوا لیتی ہے، ملک بھر میں اسی کی سیاست چلتی ہے۔ اب وقت آ گیا ہے کہ جماعت اسلامی پنجاب میں ایک بڑی سیاسی جماعت بن کر سامنے آئے، بہت جلد جماعت اسلامی ملک بھر میں بڑی پارلیمانی قوت بنے گی۔
حافظ نعیم الرحمان کا کہنا تھا کہ پاکستان کا سیاسی، سماجی اور معاشی نظام چند ہاتھوں میں یرغمال ہے، طاقتور عناصر انتخابی نظام میں انجینئرنگ کرتے ہیں، کبھی آر ٹی ایس بٹھایا جاتا ہے تو کبھی فارم 47 کے ذریعے عوام پر فیصلے مسلط کیے جاتے ہیں۔ سیاسی جماعتوں کی لڑائی عوام کے لیے نہیں بلکہ ذاتی مفادات کے لیے ہوتی ہے۔
امیر جماعت اسلامی نے کہا کہ گزشتہ 80 برس سے اسٹیبلشمنٹ کے سائے تلے مختلف جماعتیں قوم پر مسلط کی جا رہی ہیں، جاگیرداری، سرمایہ داری اور سیاسی کلچر نے نظام کو جکڑ رکھا ہے۔ ملک میں عدل و انصاف کا نظام دکھائی نہیں دیتا، نظام کی تبدیلی اور رائے عامہ کو ہموار کرنے کے لیے جماعت اسلامی کو آگے آنا ہوگا۔
حافظ نعیم الرحمان نے آئندہ سیاسی سرگرمیوں کا اعلان کرتے ہوئے کہا کہ 29 نومبر کو مینار پاکستان پر تاریخی جلسہ عام ہوگا، حکومت اسے روکنے کی کوشش نہ کرے۔ 29 نومبر سے قبل بھرپور عوامی مہم چلائی جائے گی، جبکہ 5 دسمبر کو پشاور اور 20 دسمبر کو کراچی میں بھی بڑے جلسے منعقد کیے جائیں گے۔





