پنجاب میں ڈیجیٹل ادائیگی کرنے والے شہریوں کی لاٹری نکلنے والی ہے، ریسٹورنٹس میں ادائیگی پر انعامات دینے کا فیصلہ

لاہور (جانب منزل نیوز) پنجاب میں ڈیجیٹل ادائیگیوں کے فروغ کے لیے شہریوں کو انعامات سے نوازنے کی تیاری کرلی گئی۔ پنجاب ریونیو اتھارٹی نے ہوٹلز اور ریسٹورنٹس میں QR کوڈ کے ذریعے ادائیگی کرنے والے صارفین کے لیے خصوصی انعامی اسکیم شروع کرنے کا فیصلہ کیا ہے۔
اس اقدام کے تحت اب ریسٹورنٹس میں کھانے کا بل ادا کرنا صرف چند لمحوں کا آسان عمل ہی نہیں بلکہ انعام جیتنے کا موقع بھی بن سکتا ہے۔ شہری QR کوڈ اسکین کرکے ڈیجیٹل ادائیگی کریں گے اور اسکیم کے تحت انعامات حاصل کرنے کے اہل ہوں گے۔
پنجاب ریونیو اتھارٹی کے ترجمان کے مطابق اس منصوبے کا بنیادی مقصد عوام کو نقد رقم کے بجائے جدید ڈیجیٹل ادائیگیوں کی طرف راغب کرنا ہے۔ ڈیجیٹل لین دین سے نہ صرف ادائیگیوں کا نظام آسان اور شفاف ہوگا بلکہ ٹیکس وصولیوں کے نظام کو بھی مزید مؤثر بنایا جاسکے گا۔
ترجمان نے واضح کیا کہ QR کوڈ کے ذریعے ادائیگی سے انکار کرنے والوں کے خلاف سخت قانونی کارروائی کی جائے گی۔