اماراتی اور آسٹرین فنکار ایک چھت تلے جمع، فن کے ذریعے اتحاد کا منفرد پیغام

دبئی (جانب منزل نیوز ) متحدہ عرب امارات نے فن اور ثقافت کے ذریعے عالمی برادری کو قریب لانے کی جانب ایک اہم قدم اٹھا لیا۔ دبئی میں ’’WeBecomeOne‘‘ کے نام سے نئے بین الاقوامی ثقافتی منصوبے کا باضابطہ آغاز کر دیا گیا، جس کے تحت اماراتی فنکاروں اور آسٹریا کے معروف آرٹسٹ ٹام لوہنر کو مشترکہ تخلیقی پلیٹ فارم فراہم کیا گیا ہے۔
اس منفرد اقدام کا بنیادی مقصد مختلف ممالک کی ثقافتوں کو فن کے ذریعے جوڑنا، تخلیقی مکالمے کو فروغ دینا اور نوجوان اماراتی فنکاروں کو بین الاقوامی سطح پر اپنی صلاحیتیں منوانے کے مواقع فراہم کرنا ہے۔
دبئی انٹرنیشنل فنانشل سینٹر (DIFC) میں افتتاحی تقریب کے دوران منصوبے کے پہلے فن پارے ’’Hands of Becoming‘‘ کی رونمائی بھی کی گئی۔ یہ تخلیق مختلف ثقافتوں، انفرادی شناخت اور باہمی تعاون کی خوبصورت عکاسی کرتی ہے۔
VFS Global کے بانی اور چیف ایگزیکٹو زوبن کارکاریا کے مطابق اس منصوبے کا وژن نوجوان اماراتی فنکاروں کو عالمی شہرت یافتہ تخلیق کاروں کے ساتھ کام کرنے، نئے خیالات سیکھنے اور دنیا بھر میں اپنا فن متعارف کرانے کے مواقع فراہم کرنا ہے۔
آسٹریا کے سفیر برنڈ الیگزینڈر بائرل نے بھی اس اقدام کو دونوں ممالک کے مضبوط ثقافتی تعلقات کی اہم پیش رفت قرار دیا۔
منصوبے کی نمائش 15 نومبر تک DIFC Art Nights میں جاری رہے گی، جبکہ اس کے پہلے فن پارے کو 2027 میں ایکسپو بلغراد میں بھی پیش کرنے کا اعلان کیا گیا ہے۔ دبئی سے شروع ہونے والا یہ منصوبہ مستقبل میں عالمی سطح پر فنکاروں اور ثقافتوں کو جوڑنے کا اہم ذریعہ بننے کی توقع رکھتا ہے۔