دبئی امیگریشن کا خلیجی سطح پر شاندار اعزاز، بہترین سرکاری ہیومن ریسورس ٹیم کا ایوارڈ جیت لیا

دبئی (جانب منزل نیوز) متحدہ عرب امارات نے حکومتی کارکردگی اور انتظامی مہارت کے میدان میں ایک اور اہم سنگ میل عبور کرلیا۔ دبئی کے جنرل ڈائریکٹوریٹ آف آئیڈینٹیٹی اینڈ فارنرز افیئرز (GDRFA) نے GCC GOV HR & Youth Awards 2026 میں بہترین سرکاری ہیومن ریسورس ٹیم کا باوقار اعزاز حاصل کرلیا۔
یہ ایوارڈ ادارے کو جدید افرادی قوت کی منصوبہ بندی، باصلاحیت افراد کی تربیت و ترقی، مؤثر انتظامی حکمت عملی اور ادارہ جاتی نظم و نسق کو مضبوط بنانے پر دیا گیا۔ 21 اکتوبر کو منعقدہ تقریب میں ملنے والا یہ اعزاز دبئی کے جدید حکومتی ماڈل کی ایک اور نمایاں کامیابی ہے۔
جی ڈی آر ایف اے دبئی نے انسانی وسائل کے انتظام کو جدید ٹیکنالوجی اور ڈیٹا پر مبنی فیصلوں سے ہم آہنگ کرتے ہوئے سرکاری شعبے میں کارکردگی اور استعداد بڑھانے کے لیے مؤثر اقدامات کیے ہیں۔
ادارے نے اس سے قبل اکنامک ٹائمز ہیومن کیپیٹل ایوارڈز مینا 2026 میں گورنمنٹ ورک فورس انٹیلی جنس سسٹم پر گولڈ ایوارڈ بھی حاصل کیا تھا۔
جی ڈی آر ایف اے دبئی کے اسسٹنٹ ڈائریکٹر جنرل برائے انسانی وسائل و مالیات میجر جنرل عوض محمد العویم نے کہا کہ یہ اعزاز ادارے کے مضبوط ہیومن کیپیٹل مینجمنٹ نظام اور جدید انتظامی اصولوں پر عمل درآمد کا اعتراف ہے۔
انہوں نے کہا کہ قومی ٹیلنٹ میں سرمایہ کاری، ملازمین کی صلاحیتوں میں اضافہ اور جدید و لچکدار نظام کی تشکیل ادارے کی بنیادی ترجیحات ہیں۔
یہ کامیابی ادارے کے ہیومن ریسورسز ڈیپارٹمنٹ، ورک فورس پلاننگ اینڈ اینالیسس سیکشن اور آرگنائزیشنل اسٹرکچرز برانچ کی مشترکہ محنت کا نتیجہ ہے۔