دبئی پولیس کا مفت اعصاد کارڈ جیتنے کا شاندار موقع

دبئی (جانب منزل نیوز) متحدہ عرب امارات کے رہائشیوں کے لیے خوشخبری، دبئی پولیس نے پانچ مفت اعصاد (Esaad) کارڈز جیتنے کے لیے آن لائن مقابلے کا آغاز کر دیا۔ شہریوں کو ٹریفک قوانین سے متعلق معلومات آزمانے کے ساتھ شاپنگ، ہوٹلز، ریسٹورنٹس اور دیگر سہولیات پر خصوصی رعایتیں حاصل کرنے کا موقع ملے گا۔
مقابلے میں شرکت کے لیے امیدواروں کو سڑکوں پر محفوظ سفر اور ٹریفک قوانین سے متعلق 10 سوالات پر مشتمل آن لائن کوئز مکمل کرنا ہوگا۔ تمام سوالات کے جوابات دینے والے شرکا الیکٹرانک قرعہ اندازی میں شامل ہوں گے، جس کے ذریعے پانچ فاتحین منتخب کیے جائیں گے۔
دلچسپی رکھنے والے افراد سرکاری ویب سائٹ amanroads.gov.ae/trsp/en پر جائیں اور ’Participate Now‘ کے آپشن پر کلک کریں۔ اس کے بعد ایمریٹس آئی ڈی نمبر، مکمل نام، عمر، قومیت اور رہائشی امارت کی تفصیلات درج کریں۔ ڈرائیونگ لائسنس کی معلومات فراہم کرنا اختیاری ہے۔
رجسٹریشن کے بعد روڈ سیفٹی کے 10 سوالات حل کریں، محفوظ ڈرائیونگ کے عہد نامے کی تکمیل کریں اور اپنی انٹری جمع کرا دیں۔
مقابلے میں شرکت کی آخری تاریخ 13 دسمبر 2026 ہے۔ مقررہ تاریخ کے بعد الیکٹرانک قرعہ اندازی کے ذریعے پانچ کامیاب امیدواروں کا انتخاب کیا جائے گا۔
دبئی پولیس نے اعصاد کارڈ 13 مارچ 2018 کو متعارف کرایا تھا۔ یہ خصوصی مراعاتی پروگرام اہل ممبران کو متحدہ عرب امارات اور بیرونِ ملک ہزاروں برانڈز اور کاروباری اداروں میں خصوصی ڈسکاؤنٹس فراہم کرتا ہے۔
پروگرام کے تحت منتخب مصنوعات اور خدمات پر 20 سے 70 فیصد تک رعایت، 11 ہزار 500 سے زائد آفرز اور 6 ہزار 600 سے زیادہ برانڈز تک رسائی ممکن ہے۔ ان سہولیات میں خریداری، کھانے پینے، ہوٹلوں، صحت، تعلیم، سفر اور تفریح کے شعبے شامل ہیں۔
دبئی پولیس کے اس اقدام کا بنیادی مقصد ٹریفک قوانین سے آگاہی بڑھانا اور حادثات کا سبب بننے والی خطرناک ڈرائیونگ عادات کی روک تھام ہے۔ کوئز میں تیز رفتاری، گاڑیوں کے درمیان محفوظ فاصلہ برقرار نہ رکھنے اور سڑک کنارے غیر محفوظ انداز میں گاڑی روکنے جیسے اہم موضوعات شامل کیے گئے ہیں۔