دبئی ٹیکسی کمپنی کی آمدن میں 26 فیصد زبردست اضافہ

دبئی (جانب منزل نیوز) متحدہ عرب امارات میں جدید سفری سہولیات اور ٹرانسپورٹ کے شعبے میں دبئی ٹیکسی کمپنی نے نمایاں کاروباری کامیابی حاصل کرلی۔ رواں سال کی تیسری سہ ماہی میں کمپنی کی آمدن 25.7 فیصد اضافے کے ساتھ 735.5 ملین درہم تک پہنچ گئی، جس میں نیشنل ٹیکسی کے حصول اور انضمام نے کلیدی کردار ادا کیا۔
کمپنی کی مالی رپورٹ کے مطابق گزشتہ سال اسی عرصے میں آمدن 585.3 ملین درہم تھی، جو رواں سال بڑھ کر 735.5 ملین درہم ہوگئی۔ تاہم زیادہ آپریشنل اور مالیاتی اخراجات اور مسافروں کی طلب میں کمی کے باعث خالص منافع 25.3 فیصد گھٹ کر 57.1 ملین درہم رہا۔
دبئی ٹیکسی اور نیشنل ٹیکسی نے سہ ماہی کے دوران مجموعی طور پر 18.5 ملین ٹیکسی اور لیموزین ٹرپس مکمل کیے، جبکہ دونوں کمپنیوں کے مشترکہ گاڑیوں کے بیڑے کی تعداد 15 ہزار 388 تک پہنچ گئی۔ دبئی کی ٹیکسی مارکیٹ میں مشترکہ کاروبار کا حصہ تقریباً 59 فیصد ہوگیا ہے۔
کمپنی کے ڈیلیوری بائیک بزنس نے شاندار کارکردگی دکھاتے ہوئے آمدن میں 75.2 فیصد اضافہ ریکارڈ کیا، جو 32.1 ملین درہم تک پہنچ گئی۔ بولٹ رائیڈ ہیلنگ پلیٹ فارم پر بھی ٹرپس کی تعداد 52 فیصد اضافے کے ساتھ 2.3 ملین ہوگئی۔
دبئی ٹیکسی نے ماحول دوست سفری سہولیات کے فروغ کے لیے الٹرا فاسٹ الیکٹرک گاڑیوں کا چارجنگ مرکز بھی فعال کردیا ہے، جس کے پہلے مرحلے میں 24 چارجنگ پوائنٹس قائم کیے گئے ہیں۔ مستقبل میں 200 سے زائد چارجنگ پوائنٹس پر مشتمل نیٹ ورک بنانے کا منصوبہ ہے۔
کمپنی کے ٹیکسی اور لیموزین بیڑے میں 846 مکمل الیکٹرک گاڑیاں شامل ہوچکی ہیں، جبکہ خودکار ڈرائیونگ اور ڈیجیٹل موبیلٹی ٹیکنالوجی میں سرمایہ کاری بھی جاری ہے۔
دبئی ٹیکسی کے مطابق نیشنل ٹیکسی کے انضمام کا تقریباً 30 فیصد کام مکمل ہوچکا ہے، جبکہ کمپنی آئندہ مرحلے میں سفری سہولیات کی توسیع، گاڑیوں کے بہتر استعمال اور جدید ٹیکنالوجی کے ذریعے خدمات کا معیار مزید بلند کرنے پر توجہ دے گی۔