جھانوی کپور کا شیکھر پہاڑیا سے رشتے کا اعتراف، شادی کا عندیہ بھی دے دیا

ممبئی (جانب منزل نیوز) بالی ووڈ کی معروف اداکارہ جھانوی کپور نے شیکھر پہاڑیا کے ساتھ اپنے تعلقات کی تصدیق کرتے ہوئے شادی سے متعلق اپنے منصوبوں سے بھی پردہ اٹھا دیا۔ معروف میزبان کرن جوہر کے شو ’’کافی ود کرن‘‘ سیزن 9 میں گفتگو کرتے ہوئے اداکارہ نے واضح کیا کہ شادی کے لیے ابھی کم از کم دو سے تین سال انتظار کرنا ہوگا۔
جھانوی کپور نے بتایا کہ وہ اپنے نجی تعلقات کی ہر تفصیل عوام کے سامنے لانے کی خواہش مند نہیں، تاہم رشتے کو مکمل طور پر چھپانا بھی انہیں مناسب نہیں لگتا۔ ان کے مطابق شیکھر پہاڑیا مشکل وقت میں ان کے ساتھ کھڑے رہے، جس نے اس رشتے پر ان کے اعتماد کو مزید مضبوط کیا۔
اداکارہ نے اپنی والدہ سری دیوی کے انتقال کا ذکر کرتے ہوئے بتایا کہ اس وقت شیکھر لندن میں زیرِ تعلیم تھے اور دونوں کے درمیان باقاعدہ تعلق بھی نہیں تھا، اس کے باوجود وہ ان کی مدد کے لیے ممبئی پہنچ گئے۔ جھانوی کے مطابق شیکھر کا یہ جذبہ اور مستقل مزاجی ان کے لیے انتہائی اہمیت رکھتا ہے۔
جھانوی کپور آنے والے برسوں میں متعدد فلمی منصوبوں میں مصروف رہیں گی۔ ان کی آئندہ فلموں میں ’’لگ جا گلے‘‘ اور ’’جیکی‘‘ سمیت دیگر بڑے منصوبے شامل ہیں۔ اداکارہ کے بیان سے واضح ہوتا ہے کہ فی الحال ان کی توجہ اپنے فلمی کیریئر اور تعلقات کو متوازن رکھنے پر مرکوز ہے، جبکہ شادی کے لیے مزید چند سال انتظار کرنا پڑے گا۔