لائسنس نہیں تو گاڑی سڑک پر نہیں ،،، عجمان پولیس کا دوٹوک پیغام

عجمان (جانب منزل نیوز)عجمان پولیس نے بغیر ڈرائیونگ لائسنس گاڑی چلانے والوں کو خبردار کرتے ہوئے کہا ہے کہ غیر قانونی ڈرائیونگ نہ صرف اپنی بلکہ دوسروں کی زندگیوں کو بھی خطرے میں ڈال سکتی ہے۔ پولیس نے واضح کیا ہے کہ لائسنس کے بغیر گاڑی چلانے پر قانونی کارروائی کا سامنا کرنا پڑ سکتا ہے۔
عجمان پولیس کے محکمہ ٹریفک اینڈ پٹرولز نے ٹریفک حادثات کی روک تھام، انسانی جانوں اور املاک کے تحفظ کے لیے ’’ڈرائیونگ وِد آؤٹ اے لائسنس‘‘ کے عنوان سے آگاہی مہم شروع کر دی ہے۔
محکمہ ٹریفک اینڈ پٹرولز کے ڈائریکٹر کرنل راشد حمید بن ہندی کے مطابق بغیر لائسنس ڈرائیونگ کرنے والے افراد ضروری تربیت اور محفوظ ڈرائیونگ کی اہلیت سے محروم ہو سکتے ہیں، جس سے سڑکوں پر حادثات کا خطرہ بڑھ جاتا ہے۔
پولیس نے شہریوں اور رہائشیوں کو ہدایت کی ہے کہ وہ اپنے ڈرائیونگ لائسنس کی میعاد پر نظر رکھیں اور بروقت تجدید یقینی بنائیں۔ اس کے ساتھ یہ بھی ضروری ہے کہ لائسنس متعلقہ گاڑی چلانے کی اجازت دیتا ہو۔
مہم کے تحت عربی اور انگریزی زبانوں میں آگاہی مواد جاری کیا گیا ہے تاکہ عوام کو غیر قانونی ڈرائیونگ کے خطرات اور اس کے قانونی نتائج سے آگاہ کیا جا سکے۔
عجمان پولیس نے خاندانوں سے اپیل کی ہے کہ وہ بچوں کو ٹریفک قوانین کی اہمیت سمجھائیں اور کسی ایسے فرد کو گاڑی چلانے کی اجازت نہ دیں جس کے پاس مجاز ڈرائیونگ لائسنس نہ ہو۔
پولیس کے مطابق قانون کی پابندی، ذمہ دارانہ ڈرائیونگ اور عوامی تعاون سڑکوں کو محفوظ بنانے اور قیمتی انسانی جانوں کے تحفظ میں بنیادی کردار ادا کرتے ہیں۔