اماراتی پرچم ڈے 2026: چار رنگوں کی کہانی، قومی اتحاد کی تاریخ اور پرچم لہرانے کے اصول

دبئی (جانب منزل نیوز) متحدہ عرب امارات میں قومی پرچم ڈے 3 نومبر کو منایا جائے گا۔ نائب صدر و وزیراعظم متحدہ عرب امارات اور دبئی کے حکمران شیخ محمد بن راشد المکتوم نے شہریوں، مقیم غیر ملکیوں، سرکاری اداروں، اسکولوں، جامعات اور گھروں میں قومی پرچم لہرانے کی اپیل کی ہے۔
قومی پرچم ڈے کا آغاز 2013 میں ہوا تھا۔ یہ دن سابق صدر شیخ خلیفہ بن زاید النہیان کے 2004 میں صدر منتخب ہونے کی مناسبت سے منایا جاتا ہے۔ اس موقع پر امارات بھر میں پرچم کشائی کی تقریبات منعقد کی جاتی ہیں، جن کا مقصد قومی اتحاد، حب الوطنی اور وطن سے وفاداری کے جذبات کو اجاگر کرنا ہے۔ یہ دن سرکاری تعطیل نہیں ہے۔
متحدہ عرب امارات کا قومی پرچم 2 دسمبر 1971 کو ریاست کے بانی شیخ زاید بن سلطان النہیان نے اتحاد کے قیام کے موقع پر لہرایا تھا۔ پرچم کو عبداللہ المعینہ نے ڈیزائن کیا، جنہوں نے 1971 میں اخبار الاتحاد کے زیر اہتمام قومی مقابلہ جیتا تھا۔
پرچم کے چار رنگ سرخ، سبز، سفید اور سیاہ ہیں۔ سرخ رنگ بہادری اور قربانی، سبز خوشحالی اور ترقی، سفید امن اور دیانت داری جبکہ سیاہ طاقت اور عزم کی علامت ہے۔
حکام کی ہدایات کے مطابق قومی پرچم کو صاف ستھرا اور اچھی حالت میں رکھنا ضروری ہے۔ پھٹے ہوئے یا رنگ پھیکا پڑ جانے والے پرچم کو تبدیل کرنا چاہیے، جبکہ پرچم کی دانستہ بے حرمتی یا اسے نقصان پہنچانا قانون کے تحت قابلِ سزا جرم ہو سکتا ہے۔
قومی پرچم ڈے امارات کے ساتوں امارات میں اتحاد، قومی شناخت اور حب الوطنی کے جذبے کی تجدید کا اہم موقع ہے۔