شارجہ پولیس کی بڑی کارروائی ، 14 ممالک میں انفلوئنسرز کو بلیک میل کرنے والا سائبر گینگ بے نقاب

شارجہ (جانب منزل نیوز) شارجہ پولیس نے جدید ٹیکنالوجی، مصنوعی ذہانت اور بین الاقوامی تعاون کی مدد سے ایسے سائبر کرائم نیٹ ورک کا سراغ لگایا ہے جو مبینہ طور پر 14 ممالک میں سوشل میڈیا انفلوئنسرز اور معروف شخصیات کی نجی تصاویر چوری کرکے انہیں بلیک میل کرتا تھا۔
شارجہ پولیس کے ڈیجیٹل کرائمز سیکشن کے سربراہ لیفٹیننٹ کرنل صقر احمد کے مطابق، تحقیقات کا آغاز ایک متاثرہ شخص کی شکایت سے ہوا، جس کے بعد خصوصی ٹیموں نے ڈیجیٹل فرانزک اور جدید ٹیکنالوجی کے ذریعے نیٹ ورک کی سرگرمیوں کا پتا لگایا۔
حکام کے مطابق ملزمان مبینہ طور پر فوٹو ایڈیٹنگ فلٹرز اور جعلی آن لائن سروسز کے ذریعے صارفین کی نجی تصاویر اور اکاؤنٹس کی معلومات حاصل کرتے تھے۔ بعد ازاں تصاویر منظرعام پر لانے کی دھمکی دے کر تاوان طلب کیا جاتا تھا۔ گروہ مبینہ طور پر متاثرین کو اکاؤنٹ محفوظ بنانے اور تصاویر واپس دلانے کے نام پر بھی رقم وصول کرتا تھا، جبکہ خواتین کو خاص طور پر نشانہ بنایا جاتا تھا۔
شارجہ پولیس کے مطابق بین الاقوامی قانون نافذ کرنے والے اداروں کے تعاون سے نیٹ ورک کے ارکان کی شناخت اور ان کے خلاف کارروائی کی گئی۔ پولیس نے شہریوں کو خبردار کیا ہے کہ وہ غیر تصدیق شدہ ایپس، مشکوک لنکس اور سوشل میڈیا اکاؤنٹس کی تصدیق یا بحالی کے نام پر پیش کی جانے والی جعلی خدمات سے محتاط رہیں۔
حکام نے آن لائن بلیک میلنگ کا شکار افراد کو ہدایت کی ہے کہ وہ پیغامات، فون نمبرز اور دیگر ڈیجیٹل شواہد محفوظ رکھیں اور فوری طور پر پولیس کو اطلاع دیں۔