اتحاد ریل کی مقبولیت کا نیا ریکارڈ، پہلے ہی ماہ 1 لاکھ 20 ہزار ٹکٹ فروخت

دبئی (جانب منزل نیوز) متحدہ عرب امارات کے جدید سفری نظام میں اتحاد ریل نے اپنے پہلے ہی مہینے میں کامیابی کے نئے جھنڈے گاڑ دیے۔ مسافر ٹرین سروس کے آغاز کے صرف 30 روز میں ایک لاکھ 20 ہزار ٹکٹوں کی فروخت نے ثابت کردیا کہ امارات میں جدید ریل سفر عوام کی نئی پسند بنتا جا رہا ہے۔
30 ستمبر سے 30 اکتوبر 2026 تک فروخت ہونے والے ٹکٹوں کی تعداد نے قومی مسافر ریل نیٹ ورک کے شاندار آغاز کی عکاسی کی ہے۔ اس سروس کے ذریعے ابوظہبی، دبئی، شارجہ کے علاقے الذید اور فجیرہ کو جدید سفری رابطے سے منسلک کیا گیا ہے۔
اتحاد ریل مسافروں کو سڑک کے رش اور ڈرائیونگ کی تھکن سے ہٹ کر آرام دہ، محفوظ اور قابلِ اعتماد سفری متبادل فراہم کر رہی ہے۔ ٹرین میں چارجنگ پوائنٹس سمیت ایسی سہولتیں موجود ہیں جن سے کاروباری افراد سفر کے دوران بھی اپنے کام جاری رکھ سکتے ہیں، جبکہ خاندان پرسکون ماحول میں سفر سے لطف اندوز ہوسکتے ہیں۔
دبئی کے الیلایس اسٹیشن کو جمیرہ گالف اسٹیٹس میٹرو اسٹیشن سے خصوصی پیدل پل کے ذریعے منسلک کیا گیا ہے۔ ابوظہبی میں محمد بن زاید سٹی اسٹیشن سے اہم مقامات، بشمول اے ڈی این او سی ہیڈکوارٹرز، اے ڈی این ای سی سینٹر، ریئم مال اور یاس آئی لینڈ کے لیے شٹل بسیں بھی دستیاب ہیں۔
اتحاد ریل مستقبل میں اپنے مسافر نیٹ ورک کو مزید وسعت دینے کی منصوبہ بندی کر رہی ہے۔ آئندہ مرحلے میں لیوا، مدینۃ زاید اور الظفرہ ریجن کے دیگر علاقوں میں اسٹیشنز کھولنے کی تیاری ہے، جس سے مزید شہریوں اور سیاحوں کو جدید ٹرین سروس سے مستفید ہونے کا موقع ملے گا۔
اتحاد ریل کی پہلے مہینے میں ایک لاکھ 20 ہزار ٹکٹوں کی فروخت امارات کے جدید ٹرانسپورٹ وژن کی کامیابی اور عوام میں ماحول دوست، آرام دہ اور مربوط سفری سہولتوں کی بڑھتی ہوئی مقبولیت کا نمایاں اظہار ہے۔