دبئی (جانب منزل نیوز) دبئی حکومت نے فوڈ سکیورٹی اسٹریٹجی 2030 کے تحت رہائشیوں کو محفوظ، معیاری، صحت بخش اور سستی خوراک کی مسلسل فراہمی یقینی بنانے کے لیے جامع اقدامات کا اعلان کیا ہے۔ اس حکمتِ عملی کا مقصد غذائی تحفظ کو مزید مضبوط بنانے اور مقامی سطح پر خوراک کی پیداوار میں اضافہ کرنا ہے۔
منصوبے کے تحت مقامی زراعت کو فروغ دینے، کسانوں کی معاونت، خوراک کی درآمد کے ذرائع کو وسیع کرنے اور جدید زرعی ٹیکنالوجی کے استعمال پر خصوصی توجہ دی جائے گی۔ اس کے علاوہ خوراک کے ضیاع میں کمی لانے کے لیے بھی مؤثر اقدامات کیے جائیں گے۔
حکومت کی اس حکمتِ عملی کا بنیادی مقصد عالمی منڈی میں قیمتوں کے اتار چڑھاؤ، موسمیاتی تبدیلیوں اور ہنگامی حالات کے باوجود خوراک کی دستیابی برقرار رکھنا ہے، تاکہ شہریوں اور رہائشیوں کو مناسب قیمت پر معیاری خوراک میسر آسکے۔
دبئی کی فوڈ سکیورٹی اسٹریٹجی 2030 پائیدار ترقی اور عوامی فلاح و بہبود کے اہداف سے ہم آہنگ ہے۔ اس منصوبے کے ذریعے مقامی پیداواری صلاحیت بڑھانے اور خوراک کی فراہمی کے نظام کو مزید مستحکم بنانے پر زور دیا جا رہا ہے
