ابوظہبی میں ذائقوں اور تفریح کا رنگا رنگ میلہ 13 نومبر سے سجے گا

ابوظہبی (جانبِ منزل نیوز) متحدہ عرب امارات کے دارالحکومت ابوظبی میں کھانوں اور تفریح کا مقبول میلہ ’’ٹیسٹ آف ابوظبی 2026‘‘ 13 سے 15 نومبر تک یاس آئی لینڈ کے گیٹ وے پارک نارتھ میں منعقد ہوگا۔ تین روزہ فیسٹیول میں مختلف ذائقوں کے کھانے، معروف شیفس کی کوکنگ ورکشاپس، لائیو میوزک اور خاندانوں کے لیے تفریحی سرگرمیاں پیش کی جائیں گی۔
فیسٹیول میں 16 ریستوران شرکت کریں گے، جہاں شہریوں اور سیاحوں کو ایک ہی مقام پر مختلف کھانوں سے لطف اندوز ہونے کا موقع ملے گا۔ ہر ریستوران کی جانب سے تین سے پانچ خصوصی ڈشز پیش کیے جانے کی توقع ہے۔ شریک ریستورانوں میں المایاس، پنکوڈ، پیراڈیسو، ٹنگ ایری، ولا ٹوسکانا اور دی رامن بار سمیت دیگر نام شامل ہیں۔
فیسٹیول کے نمایاں پروگراموں میں اطالوی شیف جینو ڈی اکامپو، آئرش شیف ریچل ایلن اور شیف تھامس اسٹرائیکر کی کوکنگ ورکشاپس اور عملی مظاہرے شامل ہوں گے۔ شرکا کو کھانا پکانے کی نئی تکنیکیں سیکھنے اور مختلف پکوانوں کی تیاری کے طریقوں سے آگاہی حاصل کرنے کا موقع ملے گا۔ اس کے علاوہ فائر پٹ کے تحت اوپن فائر کوکنگ اور باربی کیو کے مظاہرے بھی پیش کیے جائیں گے۔
فیسٹیول میں بچوں کے لیے ’’کینڈی لینڈ کڈز زون‘‘ قائم کیا جائے گا، جہاں جھولوں، آرٹس اینڈ کرافٹس اور مختلف تفریحی سرگرمیوں کا اہتمام ہوگا۔ 12 سال سے کم عمر بچوں کا داخلہ مفت رکھا گیا ہے۔
میوزک پروگرام میں اماراتی گلوکار حمدان العبری اور دبئی کے راک بینڈ ٹون ڈیف سمیت دیگر فنکار پرفارم کریں گے، جس سے فیسٹیول میں کھانوں کے ساتھ موسیقی اور تفریح کا بھی بھرپور اہتمام ہوگا۔
فیسٹیول کے لیے پیشگی جنرل ایڈمیشن ٹکٹ 80 درہم، ٹیسٹر پیکیج 185 درہم اور وی آئی پی پیکیج 350 درہم سے شروع ہوگا۔ مختلف پیکیجز میں کھانے اور مشروبات کے واؤچرز، ورکشاپس تک رسائی اور وی آئی پی سہولتیں شامل ہیں۔
فیسٹیول جمعہ اور ہفتہ کو دوپہر 2 بجے سے رات 12 بجے تک، جبکہ اتوار کو دوپہر 2 بجے سے رات 10 بجے تک جاری رہے گا۔ منتظمین کے مطابق پیشگی ٹکٹوں کی مقررہ قیمتیں 12 نومبر تک یا ٹکٹ ختم ہونے تک دستیاب ہوں گی۔
’’ٹیسٹ آف ابوظبی 2026‘‘ مقامی شہریوں، سیاحوں اور کھانے کے شوقین افراد کو ایک ہی مقام پر بین الاقوامی ذائقوں، خاندانی تفریح اور موسیقی سے لطف اندوز ہونے کا موقع فراہم کرے گا۔