اتحاد ریل کی محفوظ سفر کے لیے قومی مہم شروع

ابوظہبی (جانب منزل نیوز) متحدہ عرب امارات میں مسافر ٹرین سروس کے آغاز کے بعد اتحاد ریل نے محفوظ سفر کے فروغ کے لیے قومی آگاہی مہم کا نیا مرحلہ شروع کر دیا۔ مہم کے ذریعے مسافروں اور عوام کو ریلوے سیفٹی کی اہمیت سے آگاہ کیا جا رہا ہے۔
گلف نیوز کے مطابق اتحاد ریل نے اس سلسلے میں ایک آگاہی ویڈیو جاری کی ہے، جس میں مسافروں کو حفاظتی ہدایات پر عمل کرنے، دوسروں کا خیال رکھنے اور سفر کے دوران ذمہ دارانہ طرزِ عمل اختیار کرنے کی ترغیب دی گئی ہے۔
اتحاد ریل موبیلیٹی کی ایگزیکٹو ڈائریکٹر کمرشل اینڈ سپورٹ ادھرا المنصوری نے کہا کہ مسافر ٹرین سروس متحدہ عرب امارات کی روزمرہ زندگی کا حصہ بن رہی ہے، اس لیے ابتدا ہی سے حفاظت کے مضبوط کلچر کو فروغ دینا ضروری ہے۔
انہوں نے واضح کیا کہ ریلوے کو محفوظ رکھنا صرف متعلقہ ادارے کی ذمہ داری نہیں بلکہ مسافروں اور کمیونٹی کو بھی حفاظتی اصولوں کی پابندی میں اپنا کردار ادا کرنا ہوگا۔
اتحاد ریل کے مطابق ریلوے سیفٹی سے متعلق آگاہی بڑھانے کے لیے اسکولوں، سرکاری اداروں اور مقامی کمیونٹیز کے ساتھ اشتراک سے پروگرامز اور سرگرمیاں جاری رکھی جائیں گی، تاکہ امارات میں ریل سفر کو مزید محفوظ اور آرام دہ بنایا جا سکے۔