ٹائیگر شیروف کی گاڑی پر فائرنگ، سلمان خان سے دوستی حملے کی وجہ قرار

ممبئی (جانب منزل نیوز) بالی ووڈ اداکار ٹائیگر شیروف کی گاڑی پر ممبئی کے علاقے جوہو میں فائرنگ کا واقعہ پیش آیا، تاہم اداکار محفوظ رہے۔ بھارتی میڈیا کے مطابق فائرنگ سے گاڑی کو نقصان پہنچا جبکہ اداکار کے ڈرائیور اور ایک آٹو رکشہ ڈرائیور کے زخمی ہونے کی اطلاعات ہیں۔
رپورٹس کے مطابق موٹرسائیکل سوار تین نامعلوم ملزمان نے مبینہ طور پر فائرنگ کی۔ جائے وقوع سے گولیوں کے پانچ خول ملے ہیں، جبکہ ممبئی پولیس نے واقعے کی تحقیقات اور ملزمان کی شناخت کے لیے کارروائی شروع کردی ہے۔
دوسری جانب لارنس بشنوئی گروپ سے منسوب ایک بیان میں فائرنگ کی ذمہ داری قبول کرنے کا دعویٰ کیا گیا ہے۔ بیان میں کہا گیا کہ ٹائیگر شیروف کو سلمان خان سے دوستی کی وجہ سے نشانہ بنایا گیا۔ تاہم اس دعوے کی آزاد ذرائع سے تصدیق نہیں ہوسکی۔
بیان میں سلمان خان کے قریبی افراد کو مستقبل میں بھی نشانہ بنانے کی دھمکی دی گئی ہے۔ پولیس واقعے کے محرکات اور ذمہ داری قبول کرنے کے دعوے کی تحقیقات کر رہی ہے۔